ຂ່າວ: ກອງປະຊຸມໜ່ວຍກຳມະບານຮາກຖານຄະນະໂຄສະນາອົບຮົມແຂວງປະຈຳເດືອນກັນຍາ(09)2019

ໃນຕອນເຊົ້າຂອງວັນທີ 24 ກັນຍາ(09)2019ນີ້; ຢູ່ທີ່ຫ້ອງປະຊຸມຄະນະໂຄສະນາອົບຮົມແຂວງ ໄດ້ເປີດກອງປະຊຸມສະຫຼຸບວຽກງານກຳມະບານຂອງໜ່ວຍຮາກຖານຄະນະໂຄສະນາອົບຮົມແຂວງຂຶ້ນ ໃຫ້ກຽດເປັນປະທານໃນຄັ້ງນີ້ ໂດຍ: ທ່ານ ຫຸມພັນ ທຳມຸງຄຸນ ຮອງເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ ທັງເປັນຜູ້ຊີ້ນຳວຽກງານອົງການຈັດຕັ້ງມະຫາຊົນ ມີຫົວໜ້າ-ຮອງຫົວໜ້າຂະແໜງ ຕະຫຼອດຮອດພະນັກງານ, ສະມາຊິກພັກ, ສະມາຊິກກຳມະບານທຸກສະຫາຍພາຍໃນຄະນະໂຄສະນາອົບຮົມແຂວງ ເຂົ້າຮ່ວມຢ່າງພ້ອມພຽງ.

          ໃນພິທີ; ໄດ້ຮັບຟັງການຜ່ານບົດສະຫຼຸບປະຈຳເດືອນ ກັນຍາ(09)2019 ຂອງໜ່ວຍກຳມະບານຮາກຖານ ຄະນະໂຄສະນາອົບຮົມແຂວງ ແລະ ທິດທາງແຜນການປະຈຳເດືອນ ຕຸລາ 2019 ໂດຍ ທ່ານ ນາງ ວົງສອນ ບົວໄຊຄໍາ ຮອງປະທານຮາກຖານກຳມະບານຄະນະໂຄສະນາອົບຮົມແຂວງ ເຊິ່ງໄດ້ຍົກໃຫ້ເຫັນສະພາບລວມ, ຈຸດພິເສດ ພ້ອມທັງຕີລາຄາດ້ານດີ ແລະ ຂໍ້ຄົງຄ້າງໃນຕະຫຼອດໄລຍະ 1 ເດືອນຜ່ານມາທີ່ໜ່ວຍກຳມະບານຮາກຖານຄະນະໂຄສະນາອົບຮົມແຂວງປະຕິບັດໄດ້. ເຊິ່ງສະແດງອອກສະມາຊິກກຳມະບານທຸກສະຫາຍພາຍໃນຄະນະໂຄສະນາອົບຮົມແຂວງ ມີສະຕິຄວາມເຄົາລົບປະຕິບັດກົດໝາຍ ແລະ  ປະຕິບັດກົດລະບຽບກໍາມະບານວາງອອກຢ່າງເຂັ້ມງວດ, ເປັນແບບຢ່າງນຳໜ້າ, ສ້າງໄດ້ສະມາຊິກກໍາມະບານປອດໃສ, ເຂັ້ມແຂງ, ໜັກແໜ້ນ, ຕໍ່ສູ້ເພື່ອປົກປ້ອງສິດ ແລະ ຜົນປະໂຫຍດອັນຊອບທຳຂອງກຳມະກອນ ແລະ ປະຊາຊົນລາວຜູ້ອອກແຮງງານບັນດາເຜົ່າ. ຖືສຳຄັນໃນການຈັດຕັ້ງປະຕິບັດລະບອບການຮ່ວມຊີວິດ, ການປະຊຸມວຽກງານກຳມະບານຂອງຕົນຢ່າງເປັນປົກກະຕິ ແລະ ປະຕິບັດລະບອບລວມສູນປະຊາທິປະໄຕພາຍໃນໜ່ວຍໄດ້ດີ ພ້ອມທັງເສຍເງິນກອງທຶນ ແລະ ເງິນສະຕິບຳລຸງໃຫ້ເປັນປົກກະຕິທຸກໆເດືອນ. ເອົາໃຈໃສ່ປຸກລະດົມສະມາຊິກກຳມະບານເຂົ້າກອງທຶນ 100% ຂອງຈຳນວນສະມາຊິກກຳມະບານທັງໝົດ. ສູ້ຊົນແຂ່ງຂັນ 5 ເປັນເຈົ້າພາຍໃນໜ່ວຍໃຫ້ໄດ້ໃບຢັ້ງຢືນ 5 ເປັນເຈົ້າທຸກໆປີ.

ຈາກນັ້ນ; ທ່ານ ພູທອນ ສຸວັນກອນ ປະທານກຳມະບານຮາກຖານຄະນະໂຄສະນາອົບຮົມແຂວງ ໄດ້ຂຶ້ນຜ່ານກົດລະບຽບຂອງສະຫະພັນກຳມະບານລາວສະໄໝທີ່ VII ແລະ ແຈກຢາຍປື້ມຕິດຕາມສະມາຊິກກໍາມະບານລາວ 5 ເປັນເຈົ້າໃຫ້ກັບສະມາຊິກກຳມະບານຮາກຖານຄະນະໂຄສະນາອົບຮົມແຂວງທຸກໆສະຫາຍ.