​ຊົມ​ເຊີມ​ວັນ​ສ້າງ​ຕັ້ງ​ພັກ ​ປະ​ຊາ​ຊົນ​ປະ​ຕິ​ວັດ​ລາວ ​ຄົບ​ຮອບ 66 ປີ ຢ່າງ​ສຸດ​ໃຈ.

ອອກ​ແຮງ​ແຂ່ງ​ຂັນ​ສ້າງ​ຜົນ​ງານ​ຄຳ​ນັບ​ຮັບ​ຕ້ອນ​ວັນ​ສ້າງ​ຕັ້ງ​ພັກ ຄົບ​ຮອບ 66 ປີ.

ພາ​ລະ​ບົດ​ບາດ

 

ສາທາລະນະລັດ ປະຊາທິປະໄຕ ປະຊາຊົນລາວ

ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ

ພັກປະຊາຊົນປະຕິວັດລາວ

ຄະນະປະຈຳພັກແຂວງ                                                          ເລກທີ........ / ຄ-ຫຼບ.

                                                                      ຫຼວງພະບາງ, ວັນທີ.........../...../2020.

ມະຕິຕົກລົງ

ຂອງຄະນະປະຈຳພັກແຂວງຫຼວງພະບາງ

ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຄະນະໂຄສະນາອົບຮົມແຂວງ.

- ອີງຕາມ: ມະ​ຕິຕົກ​ລົງ​ ຂອງ​ກົມ​ການ​ເມືອງ​ສູນ​ກາງ​ພັກສະ​ບັບ​ເລກ​ທີ 04/ ກມ​ສ​ພລົງ​ວັນ​ທີ 21 ມີ​ຖຸ​ນາ 2013 ວ່າ​ດ້ວຍ​ການ​ຈັດ​   ຕັ້ງແລະ​ການ​ເຄື່ອນ​ໄຫວ ຂອງ​ຄະ​ນະ​ໂຄ​ສະ​ນາ​ອົບ​ຮົມ​ສູນ​ກາງ​ພັກ.

- ອີງຕາມ: ແຈ້ງ​ການ​ແນະ​ນຳ ຂອງ​ຄະ​ນະ​ໂຄ​ສະ​ນາ​ອົບ​ຮົມ​ສູນ​ກາງ​ພັກ ສະ​ບັບ​ເລກ​ທີ 05/ ຄອ​ສ​ພ ລົງ​ວັນ​ທີ 31 ພຶດ​ສະ​ພາ 2014                ວ່າ​ດ້ວຍ​ການ​ນຳ​ໃຊ້​ພາ​ລະ​ບົດ​ບາດ, ສິດ​ໜ້າ​ທີຂອງ​ຄະ​ນະ​ໂຄ​ສະ​ນາ​ອົບ​ຮົມ​ແຂວງ, ນະ​ຄອນຫຼວງ.

 

ຄະນະປະຈຳພັກແຂວງຫຼວງພະບາງຕົກລົງ:

ໝວດທີI

ບົດບັນຍັດທົ່ວໄປ

ມາດຕາ 1ຈຸດປະສົງ.

       ມະ​ຕິ​ຕົກ​ລົງ​ສະ​ບັບ​ນີ້ກຳ​ນົດ​ທີ່​ຕັ້ງ, ພາ​ລະ​ບົດ​ບາດ, ສິດ​ໜ້າ​ທີ່, ໂຄງ​ປະ​ກອບ​ການ​ຈັດ​ຕັ້ງ, ຫຼັກ​ກ​ານ ແລະ ແບບ​ແຜນ​ວິ​ທີ​ເຮັດ​ວຽກເພື່ອ​ເປັນ​ບ່ອນ​ອີງ​ດ້ານ​ນິ​ຕິ​ກຳ​ໃຫ້​ແກ່​ການ​ຈັດ​ຕັ້ງ ແລະ ການ​ເຄື່ອນ​ໄຫວ​ຂອງ​ຄະ​ນະ​ໂຄ​ສະ​ນາ​ອົບ​ຮົມ​ແຂວງ ແນ່​ໃສ່​ຈັດ​ຕັ້ງ​ປະ​ຕິ​ບັດ​ວຽກ​ງານ​ໂຄ​ສະ​ນາ​ອົບ​ຮົມ ໃຫ້​ມີ​ປະ​ສິດ​ທິ​ຜົນ​ສູງ.

ມາດຕາ 2 ທີ່ຕັ້ງແລະພາລະບົດບາດ

       ຄະນະໂຄສະນາອົບຮົມແຂວງຫຼວງ​ພະ​ບາງ, ຂຽນຊື່ຫຍໍ້ດ້ວຍຕົວອັກສອນ ( ຄອຂ-ຫຼບ) ແມ່ນອົງ​ການ​ຈັດ​ຕັ້ງ​ໜຶ່ງ ຂອງພັກ, ຢູ່​ພາຍ​ໃຕ້​ການຊີ້ນໍາ-ນໍາພາໂດຍກົງ, ຮອບດ້ານຂອງຄະນະບໍລິຫານ​ງານພັກ​ແຂວງ ​ແລະ ຄະນະ​ໂຄສະນາ​ອົບຮົມ​ສູນ​ກາງພັກ, ມີຖາ ນະທຽບເທົ່າບັນດາພະແນກການ ແລະ ອົງການຕ່າງໆ ຂັ້ນແຂວງ; ມີພາລະບົດບາດເປັນເສນາທິການ​ໃຫ້ແກ່ຄະ​ນະ​ບໍ​ລິ​ຫານ​ງານ​ພັກ​ແຂວງໃນ​ການ​ຄົ້ນ​ຄວ້າ, ຜັນ​ຂະຫຍາຍ, ດໍາ​ເນີນ​ວຽກງານ​ໂຄສະນາ​ອົບຮົມ​ແນວ​ທາງການ​ເມືອງຂອງ​ພັກ ​ໃນ​ຂົງ​ເຂດວຽກງານການ ເມືອງ-ແນວຄິດໄປ​ຕາມຫຼັກການ​ລວມສູນ​ເປັນ​ເອກະ​ພາບ.

ໝວດທີII

ວ່າດ້ວຍໜ້າທີ່ ແລະ ຂອບເຂດສິດ

ມາດຕາ 3 ໜ້າທີ່

       ຄະນະໂຄສະນາອົບຮົມແຂວງມີໜ້າທີ່ດັ່ງນີ້:

  1. ຄົ້ນ​ຄວ້າ​ເຊື່ອມ​ຊຶມກຳ​ແໜ້ນ​ແນວ​ທາງ​ນະ​ໂຍ​ບາຍ​ຂອງ​ພັກ, ມະ​ຕິ​, ຄຳ​ສັ່ງຂອງ​ສູນ​ກາງ​ພັກ, ຂອງຄະ​ນະ​ໂຄ​ສະ​ນາ​ອົບ​ຮົມ​ສູ​ນ​ກາງ​ພັກ ແລະ ຂອ​ງ​ອົງ​ຄະ​ນະ​ພັກ​ແຂວງ.
  2. ປະຕິບັດຕາມມະຕິຂອງພັກ, ຂອງຄະນະໂຄສະນາອົບຮົມສູນກາງພັກ ແລະ ຄະນະບໍ​ລິ​ຫານ​ງານພັກແຂວງ ກ່ຽວ​ກັບ​ວຽກ​ງານ​ການ​ເມືອງ-​ແນວ​ຄິດ.
  3. ຄົ້ນ​ຄວ້າສ້າງ, ​ປັບ​ປຸງ​ເນື້ອ​ໃນ​ເອ​ກະ​ສານ​ໂຄ​ສະ​ນາ​-ປາ​ຖະ​ກະ​ຖາ​ເລົ່າ​ມູນ​ເຊື້ອ​ຂອງ​ພັກ, ຂອງ​ຜູ້​ນຳ ແລະ ເຫດ​ການ​ພົ້ນ​ເດັ່ນທັງ​ພາຍ​ໃນ ແລະ ຕ່າງ​ປະ​ເທດເພື່ອ​ເຜີຍ​ແຜ່, ເຊື່ອມ​ຊຶມ​ໃຫ້​ແກ່​ເປົ້າ​ໝາຍ​ຕ່າງໆ​ ໄດ້​ຮັບ​ຮູ້ ແລະ ຈັດ​ຕັ້ງ​ປະ​ຕິ​ບັດ;
  4. ນຳ​ເອົາ​ບັນ​ດາ​ເອ​ກະ​ສານແນວທາງນະໂຍບາຍ ຂອງພັກ, ກົດໝາຍຂອງລັດ, ມະ​ຕິ, ຄຳ​ສັ່ງ, ບົດ​ແນະ​ນຳ​ຕ່າງໆ ຂອງ​​ສູນ​ກາງ​ພັກ ແລະ​ ຂອງ​ແຂວງ,  ເອກະສານມູນ​ເຊື້ອ​ ຂອງ​ຊາດ-ຂອງ​ພັກ ແລະ ຂອງ​ອົງ​ການ​ຈັດ​ຕັ້ງ​ຕ່າງໆ ນັບ​ທັງ​​ເຫດ​ການທີ່ພົ້ນເດັ່ນຢູ່ພາຍໃນ ແລະ ຕ່າງປະເທດ ເພື່ອໂຄສະນາ-ປາຖະກາຖາໃຫ້ພະນັກງານ, ສະມາຊິກພັກ, ທະຫານ, ຕຳຫຼວດ ແລະ ຊັ້ນ​ຄົນ​ຕ່າງໆ ພາຍ​ໃນ​ແຂວງ​ໄດ້​ຮັບ​ຮູ້​ຢ່າງ​ທົ່ວ​ເຖິງ;
  5. ສ້າງ​ແຜນການ, ໂຄງການໃນການບຳລຸງສ້າງຖັນແຖວພະນັກງານຜູ້ທີ່ເຮັດວຽກງານການເມືອງ-ແນວຄິດ, ນັກໂຄສະນາ-ປາຖະກະຖາ, ໃຫ້ໄດ້​ທັງ​ປະ​ລິ​ມານ ແລະຄຸນນະພາບ, ເພື່ອຕອບສະໜອງ​ຄວາມ​ຮຽກ​ຮ້ອງຕ້ອງການ ຂອງວຽກງານໃນໄລຍະໃໝ່.
  6. ຈັດຝຶກອົບຮົມ​ກ່ຽວ​ກັບວຽກ​ງານການ​ເມືອງ-ແນວ​ຄິດໃຫ້ພະນັກງານ, ສະມາຊິກພັກ, ຄະນະພັກຮາກຖານຂັ້ນ​ຕ່າງໆ, ຈັດ​ຕັ້ງ​ຮຽນ​ເອ​ກະ​ສານ​ສະ​ໜັບ​ສະ​ໜູນ​ໃຫ້​ມະ​ຫາ​ຊົນ​ຜູ້​ກ້າວ​ໜ້າ, ອົບ​ຮົມ​ສະ​ມາ​ຊິກ​ພັກ​ໃໝ່ແລະ​ອົບ​ຮົມ​ໃຫ້​ເປົ້າ​ໝາຍ​ຕ່າງໆ;
  7. ຈັດ​ຕັ້ງ​ຕາ​ໜ່າງ​ເກັບ​ກຳ​ຫາງ​ສຽງ​ສັງ​ຄົມຢູ່​ບັນ​ດາ​ພະ​ແນກ​ການ, ກົມ​ກອງ, ສະ​ຖາ​ບັນ​ການ​ສຶກ​ສາເພື່ອ​​ສະ​ໜອງ​ຂໍ້​ມູນ​ບັນ​ຫາ​ຫາງ​ສຽງ​ສັງ​ຄົມ​ເປັນ​ປົກ​ກະ​ຕິ.
  8. ກໍາແໜ້ນ, ຕິດ​ຕາມສະພາບແນວຄິດ, ຫາງສຽງສັງຄົມ, ຖ້ອຍທໍ​ານອງຂອງກຸ່ມຄົນບໍ່ດີເພື່ອສ່ອງແສງລາຍງານໃຫ້ຂັ້ນເທິງເປັນປົກກະຕິ ແລະ ສະເໜີວິທີການ, ມາດຕະການແກ້ໄຂຢ່າງທັນການ;
  9. ປະສານສົມທົບກັບຄະ​ນະ​ພັກ​ພະ​ແນກ​ການ, ​ກົມ​ກອງ, ສະ​ຖາ​ບັນ​ການ​ສຶກ​ສາ, ຄະນະພັກເມືອງ ແລະ ຄະນະໂຄສະນາອົບຮົມເມືອງ, ນະ​ຄອນເພື່ອສຶກສາອົບຮົມການເມືອງ-ແນວຄິດໃຫ້​​ສະ​ມາ​ຊິກ​ພັກ, ພະ​ນັກ​ງານ-ລັດ​ຖະກອນຢ່າງທົ່ວເຖິງ;
  10. ຈັດ​ຕັ້ງ​ການ​ໂຄ​ສະ​ນາ-ປາ​ຖະ​ກະ​ຖາ, ໂຄ​ສະ​ນາເຄື່ອນ​ທີ່ແລະໂຄ​ສະ​ນາ​ຜ່ານ​ສື່​ ເພື່ອນຳພາການ​ເມືອງ-​ແນວ​ຄິດໃຫ້​ແກ່​ຊັ້ນ​ຄົນ​ຕ່າງໆ​ຢ່າງກວ້າງ​ຂວາງ ແລະ ທົ່ວ​ເຖິງ;
  11. ສະຫຼຸບສັງລວມວຽກງານການເມືອງ-ແນວຄິດ, ລາຍ​ງານ​ໃຫ້​ຄະ​ນະ​ປະຈຳ​ພັກ​ແຂວງ ແລະ ຄະ​ນະ​ໂຄ​ສະ​ນາ​ອົບ​ຮົມ​ສູນ​ກາງ​ພັກ​ເປັນ​ແຕ່​ລະ​ໄລ​ຍະ​;
  12. ປະຕິບັດໜ້າທີ່​ອື່ນໆ ຕາມ​ການ​ມອບໝາຍຂອງຂັ້ນ​ເທີ​ງ ​ແລະ ຕາມລະບຽບກົດໝາຍກຳ​ນົດ.

ມາດຕາ 4 ຂອບເຂດສິດ 

       ຄະນະໂຄສະນາອົບຮົມແຂວງມີສິດດັ່ງນີ້:

1. ພົວພັນປະສານສົມທົບ, ຕິດຕາມ, ກວດກາ, ຊຸກຍູ້ ແລະ ປະກອບຄຳ​ຄິດ-ຄຳ​ເຫັນກ່ຽວກັບຍຸດ​ທະ​ສາດ, ແຜນການ, ໂຄງການ ຂອງຄະນະໂຄສະນາອົບຮົມແຂວງ, ເມືອງ, ນະ​ຄອນໃນຄວາມຮັບຜິດຊອບຂອງຕົນ;

2. ເຂົ້າຮ່ວມກອງປະຊຸມຕ່າງໆ ແລະ ປະກອບຄຳຄິດຄຳເຫັນທີ່ພົວພັນເຖິງວຽກງານການເມືອງ-ແນວຄິດຂອງຂັ້ນເທິງ, ພະ​ແນກການ, ອົງການ, ກົມ​ກອງແລະທ້ອງຖິ່ນຈັດຂື້ນ;

3. ອອກມະ​ຕິ, ຄໍາແນະນໍາ ແລະ ແຈ້ງການຕ່າງໆ ເຖິງພະ​ແນກ​ການ, ອົງການ, ​ກົມ​ກອງ, ​ສະ​ຖາ​ບັນ​ການ​ສຶ​ກ​ສາ, ເມືອງ, ນະ​ຄອນ ພາຍໃນແຂວງກ່ຽວກັບວຽກງານໂຄສະນາອົບຮົມ;

4. ຮຽກໂຮມປະຊຸມພະນັກງານໂຄສະນາ ຫຼື ຜູ້ຮັບຜິດຊອບວຽກງານການເມືອງ-ແນວຄິດຈາກ​ພະ​ແນກການ, ອົງການ, ກົມ​ກອງອ້ອມຂ້າງແຂວງ, ເມືອງ,ນະຄອນ ເພື່ອປືກສາຫາລື, ຄົ້ນຄວ້າຫຼື ເຜີຍແຜ່ກ່ຽວກັບທິດທາງ, ວິທີການ ແລະ ມາດຕະການດຳເນີນວຽກງານຂອງ​ຄະ​ນະໂຄສະນາອົບຮົມ;

5. ​ຄົ້ນ​ຄວ້າ, ນຳ​ສະ​ເໜີ​ຂັ້ນ​ເທິງ​ກ່ຽວ​ກັບ​ການປັບປຸງກົງຈັກການຈັດຕັ້ງເປັນ​ຕົ້ນ​ແມ່ນ​ ​ການ​ແຕ່ງ​ຕັ້ງແລະຍົກ​ຍ້າຍພະ​ນັກ​ງານ​-ລັດ​ຖະ​ກອນ​ທີ່​ມີ​ຕຳ​ແໜ່ງ​ບໍ​ລິ​ຫານ.

6.​ ​ຈັດ​ວາງ,  ບັນ​ຈຸ,  ຊັບຊ້ອນ​ບຸກ​ຄະ​ລາ​ກອນ, ປະຕິບັດນະໂຍບາຍ, ກໍ່ສ້າງ-ບຳລຸງຍົກລະດັບຄວາມຮູ້ຄວາມສາມາດດ້ານຕ່າງໆ ຂອງພະນັກງານ-ລັດຖະກອນ ໃນຄວາມຮັບຜິດຊອບຂອງຕົນ;

7. ຄຸ້ມ​ຄອງກົງ​ຈັກ​ການ​ຈັດ​ຕັ້ງ, ສະ​ມາ​ຊິກ​ພັກ, ພະ​ນັກ​ງານ-ລັດ​ຖະ​ກອນ, ງົບ​ປະ​ມານ, ພາ​ຫະ​ນະ, ວັດ​ຖຸ​ຂອງ​ສ່ວນ​ລວມເພື່ອ​ຕອບ​ສະ​ໜອງ​ຄວາມ​ຮຽກ​ຮ້ອງ​ຕ້ອງ​ການ​ຂອງວຽກ​ງານ.

8. ປະຕິບັດສິດ​ອື່ນໆຕາມ​ການ​ມອບໝາຍ ຂອງຂັ້ນ​ເທີ​ງ ​​ຖືກ​ຕ້ອງຕາມກົດໝາຍ ​ແລະ ລະບຽບການ​ກໍານົດ.

ໝວດທີIII

ວ່າດ້ວຍໂຄງປະກອບການຈັດຕັ້ງ

ມາດຕາ 5 ໂຄງປະກອບກົງຈັກ

        ໂຄງປະກອບກົງຈັກ ຂອງຄະນະໂຄສະນາອົບຮົມແຂວງ ປະກອບມີ 4 ຂະແໜງການຄື:

1. ຂະ​ແໜງບໍ​ລິ​ຫານ, ຈັດ​ຕັ້ງ, ກວດກາ;

2. ຂະແໜງໂຄສະນາ ແລະ ຜ່ານ​ສື່;

3. ຂະແໜງອົບຮົມ;

4. ຂະແໜງຄົ້ນຄວ້າ-ສັງ​ລວມ ​ເກັບ​ກຳ​ຫາງ​ສຽງ​ສັງ​ຄົມ.

ມາດຕາ 6 ໂຄງປະກອບ ຂອງບຸກຄະລາກອນ

       ໂຄງປະກອບບຸກຄະລາກອນ ຂອງຄະນະໂຄສະນາອົບຮົມແຂວງ ປະກອບດ້ວຍ:

1. ຫົວ​ໜ້າຄະນະໂຄສະນາອົບຮົມແຂວງ ໜຶ່ງທ່ານເຊິ່ງໄດ້ຮັບການແຕ່ງຕັ້ງ ຫຼື ປົດຕຳແໜ່ງຈາກຄະນະປະຈຳພັກແຂວງ, ຕາມການສະເໜີ ຂອງຄະນະຈັດຕັ້ງແຂວງໂດຍການເຫັນດີ ຂອງຄະນະໂຄສະນາອົບຮົມສູນກາງພັກ; ເປັນ​ຜູ້​ຮັບ​ຜິດ​ຊອບ​ໂດຍ​ກົງ​ຕໍ່​ຄະ​ນະ​ບໍ​ລິ​ຫານ​ງານ​ພັກ​ແຂວງ ແລະ​ ຄະ​ນະ​ໂຄ​ສະ​ນາ​ອົບ​ຮົມ​ສູນ​ກາງ​ພັກກ່ຽວ​ກັບ​ຜົນ​ສຳ​ເລັດ ແລະ ຂໍ້​ຂາດ​ຕົກ​ບົກ​ຜ່ອງ​ໃນ​ການ​ເຄື່ອນ​ໄຫວ​ວຽກ​ງານ ຂອງ​ຄະ​ນະ​ໂຄ​ສະ​ນາ​ອົບ​ຮົມ​ແຂວງ;

ໃນ​ກໍ​ລະ​ນີ​ຕິດ​ຄັດຫົວ​ໜ້າ​ຕ້ອງມອບ​ສິດ​ໃຫ້​ຮອງ​ຫົວ​ໜ້າ​ທ່ານ​ໃດ​ໜຶ່ງເປັນ​ຜູ້​ຮັກ​ສາ​ການ​ແທນ;

2. ຮອງ​ຫົວໜ້າ​ຄະນະ​ໂຄສະນາ​ອົບຮົມ​ແຂວງ ຈຳ​ນວນໜຶ່ງຊ່ວຍ​ຫົວ​ໜ້າຊີ້ນຳຂົງ​ເຂດວຽກງານ​ໃດ​ໜຶ່ງຕາມການແບ່ງ​ງານແລະ ການມອບໝາຍ; ເຊີ່ງ​ໄດ້​ຮັບ​ການ​ແຕ່ງ​ຕັ້ງ ຫຼື​ ປົດ​ຕຳ​ແໜ່ງຈາກ​ຄະ​ນະ​ປະ​ຈຳ​ພັກ​ແຂວງ ຕາມ​ການ​ສະ​ເໜີ ຂອງ​ຄະ​ນະ​ຈັດ​ຕັ້ງ​ແຂວງໂດຍ​ການ​ເຫັນ​ດີ ຂອງ​ຄະ​ນະ​ໂຄ​ສະ​ນາ​ອົບ​ຮົມ​ສູ​ນ​ກາງ​ພັກ; ຮັບ​ຜິດ​ຊອບ​ຕໍ່​ຫົວ​ໜ້າກ່ຽວ​ກັບ​ຜົນ​ສຳ​ເລັດ ແລະ ​ຂໍ້​ຂາດ​ຕົກ​ບົກ​ຜ່ອງໃນ​ວຽກ​ງານ​ທີ່​ຕົນ​ຊີ້​ນຳ;

ຮອງ​ຫົວ​ໜ້າ​ຄະ​ນະ​ໂຄສະນາຜູ້​ຮັກ​ສາ​ການ​ແທນ ຕ້ອງ​ລ​າຍ​ງານ​ວຽກ​ງານ​ທີ່​ໄດ້​ຈັດ​ຕັ້ງ​ປະ​ຕິ​ບັດ​ ໃນ​ແຕ່​ລະ​ໄລ​ຍະ​ຮັກ​ສາ​ການ​ແທນນັ້ນ​ ໃຫ້​ຫົວ​ໜ້າ​ພາຍຫຼັງ​ມາ​ປະ​ຈຳ​ການ​ເປັນ​ລາຍ​ລັກ​ອັກ​ສອນ;

3. ​ມີຫົວໜ້າຂະ​ແໜງ, ຮອງຫົວ​ໜ້າ​ຂະ​ແໜງ​ຈຳ​ນວນ​ໜຶ່ງ ຕາມ​ການ​ກຳ​ນົດ​ຕຳ​ແໜ່ງ​ງານເຊີ່ງໄດ້​ຮັບ​ການ​ແຕ່ງຕັ້ງ ຫຼື ປົດ​ຕໍາ  ແໜ່​ງໂດຍຄະນະ​ປະຈຳ​ພັກ​ແຂວງ, ບົນພື້ນຖານການ​ເຫັນ​ດີ​ເປັນ​ເອ​ກະ​ພາບ ຂອງ​ຄະ​ນະ​ໂຄ​ສະ​ນາ​ອົບ​ຮົມ​ແຂວງ ຕາມ​ການສະ​ເໜີຂອງຄະນະຈັດຕັ້ງແຂວງ ເພື່ອ​ສະ​ເໜີ​ຕໍ່​ຂັ້ນ​ເທິງ​ພິ​ຈາ​ລະ​ນາ ແລະ ປະ​ກອບ​ມີ​ພະ​ນັກ​ງານ​ວິ​ຊາ​ການ​ຈຳ​ນວນ​ໜຶ່ງ ຕາມ​ການ​ກຳ​ນົດ​ຕຳ​ແໜ່ງ​ງານ.

ໝວດທີ IV

ວ່າດ້ວຍໜ້າທີ່ ຂອງແຕ່ລະຂະແໜງ

ມາດຕາ 7 ຂະແໜງບໍລິຫານ, ຈັດຕັ້ງ, ກວດກາ ມີໜ້າທີ:

  1. ຄົ້ນຄວ້າ, ເຊື່ອມຊຶມ, ກຳ​ແໜ້ນແນວທາງນະໂຍບາຍຂອງພັກ, ກົດໝາຍ ຂອງລັດ ແລະ ແຜນຍຸດທະສາດ, ແຜນງານ, ໂຄງການກິດ​ຈະກຳ​ກ່ຽວກັບວຽກງານຄຸ້ມຄອງບໍລິຫານຫ້ອງການ, ວຽກງານຮ່ວມມືກັບຕ່າງປະເທດ, ວຽກງານຈັດຕັ້ງ ແລະກວດກາ;
  2. ເປັນໃຈກາງໃນການພົວພັນ, ປະສານງານກັບພາກສ່ວນກ່ຽວຂ້ອງ, ອຳນວຍຄວາມສະດວກໃນການເຄື່ອນໄຫວວຽກງານຂອງຄະນະນຳ, ບັນດາຂະແໜງ ແລະ ພະນັກງານ-ລັດຖະກອນ ທີ່ສັງກັດຢູ່​ຄະນະ​ໂຄສະນາ​ອົບຮົມ​ແຂວງ;
  3. ບັນທຶກເອກະສານຂາເຂົ້າ-ຂາອອກ, ຄຸ້ມຄອງຕາປະທັບ, ສໍາເນົາ ແລະ ຮັກສາເອກະສານທີ່ເປັນຄວາມລັບຂອງທາງລັດຖະການຢ່າງເຂັ້ມງວດ; ຮັບຜິດຊອບວຽກບໍລິຫານ-ພິທີການ, ຮັບແຂກ, ຈັດ​ກອງ​ປະຊຸມ​, ຮັບ-ຕອບໂທລະສັບ ແລະ ໂທລະສານ ຮ່າງເອກະສານທາງລັດຖະການ ທີ່ພົວພັນກັບວຽກງານຂອງຕົນ;
  4. ຄຸ້ມຄອງ ແລະ ຂຶ້ນແຜນກໍ່ສ້າງ, ສ້ອມແປງຕຶກອາຄານ, ພາຫະນະ, ປະມູນ, ຈັດຊື້, ເບີກຈ່າຍອຸປະກອນຮັບໃຊ້ພາຍໃນຄະນະ​ໂຄສະນາ​ອົບຮົມ​ແຂວງ;
  5. ພົວພັນຮ່ວມມືກັບຕ່າງປະເທດ, ອົງການຈັດຕັ້ງສາກົນ, ອົງການ​ສາຍຕັ້ງ ຂອງ​ຕົນ​ຂັ້ນສູນ​ກາງ ​ແລະ ຂັ້ນ​ເມືອງ, ນະຄອນຕາມແນວທາງນະໂຍບາຍຂອງພັກຕາມຫຼັກການ ແລະ ຕາມການມອບໝາຍ;
  6. ຂຶ້ນ​ທະ​ບຽນ, ຄຸ້ມ​ຄອງ, ສຳ​ເນົາ ແລ​ະ ​ສົ່ງ​ເສີມ​ການ​ອ່ານ​ເອ​ກະ​ສານ​ຕ່າງໆ ຢູ່​ຫ້ອງ​ສະ​ໝຸດ;
  7. ຮັບ ແລະ​ ສົ່ງ​ວາ​ລະ​ສານ​ອະ​ລຸນ​ໃໝ່, ວາ​ລະ​ສານ​ໂຄ​ສະ​ນາ, ສົ່ງ​ເອ​ກະ​ສານ​ຕ່າງໆໃຫ້​ແຕ່​ລະເປົ້າ​ໝາຍ;
  8. ເປັນ​ເຈົ້າ​ການຈັດຕັ້ງປະຕິບັດວຽກງານປ້ອງ​ກັນ​ຊາດ-ປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍພາຍໃນສໍານັກງານ-ອົງການ;
  9. ສ້າງແຜນການ, ໂຄງການ, ການນຳໃຊ້ງົບປະມານ, ຄຸ້ມຄອງ, ສະຫຼຸບລາຍຮັບ-ລາຍຈ່າຍ; ປະສານສົມທົບກັບພະແນກການເງິນແຂວງ ໃນການນຳໃຊ້ງົບປະມານຂອງລັດ; ຄິດໄລ່ເງິນເດືອນ, ເງິນອຸດໜູນ​ ແລະ ​ນະ​ໂຍບາຍຕ່າງໆໃຫ້ພະນັກງານ-ລັດຖະກອນ ທີ່ຢູ່ໃນຄວາມຮັບຜິດຊອບຂອງຕົນຕາມລະບຽບຫຼັກການ;
  10. ສັງລວມບັນດາເນື້ອໃນເອກະສານ,ຂໍ້ມູນຂ່າວສານຕ່າງໆ ພ້ອມທັງສ້າງແຜນການ​ເຄື່ອນ​ໄຫວໃຫ້​ແກ່​ຄະ​ນະ​ນຳ ແຕ່​ລະ​ໄລ​ຍະ;
  11. ຄົ້ນຄວ້ານຳສະ​ເໜີ​​ອົງການກ່ຽວ​ຂ້ອງກັບການປັບປຸງກົງຈັກການຈັດຕັ້ງ, ​ການກຳນົດຕຳແໜ່ງງານ, ​ການ​ປະ​ຕິ​ບັດ​ນະ​ໂຍ​ບາຍ​ຕ່າງໆເຊັ່ນ: ການຂຶ້ນ​ແຜນກໍ່​ສ້າງ​ພະ​ນັກ​ງານ​ນຳ​ພາ-ຄຸ້ມ​ຄອງ, ການ​ເລື່ອນ​ຊັ້ນ-ຂັ້ນ​ເງິນ​ເດືອນ, ອຸດ​ໜູນ​ບຳ​ນານ, ຄວາມຕ້ອງການລັດຖະກອນໃໝ່ປະຈຳປີ, ສອບເສັງ, ບັນຈຸ, ສັບຊ້ອນ, ແຕ່ງຕັ້ງ, ຍົກຍ້າຍຫຼືປົດຕຳແໜ່ງ,  ຝຶກອົບຮົມ, ຍົກລະດັບ​, ປະ​ເມີນ​ຜົນ​ການ​ປະຕິບັດ​ວຽກ​ງານ, ຈັນຍາບັນ, ຍ້ອງຍໍ, ປະຕິບັດວິໄນ ແລະ ອຶ່ນໆ;
  12. ຄຸ້ມຄອງພະ​ນັກ​ງານ-ລັດ​ຖະ​ກອນ, ເກັບ​ກຳຂໍ້ມູນ ແລະ ຊີວະປະຫວັດ ພ້ອມທັງ​ສະ​ໜອງ​ຂໍ້​ມູນ​ດ້ານ​ຈຳ​ນວນ​ພົນ​ໃຫ້​ພະ​ແນກ​ພາຍ​ໃນ​ແຂວງ ​ແຕ່​ລະ​ງວດເພື່ອ​ພິ​ຈາ​ລະ​ນາ​ດ້ານ​ຈຳ​ນວນ​ພົນ​ຂາດ​ຕົວ;
  13. ຕິດຕາມ, ກວດກາ​ປະ​ເມີນການຈັດຕັ້ງ ຫຼື ບຸກຄົນ ໃນການປະຕິບັດແນວທາງນະໂຍບາຍ ຂອງພັກ, ລະ​ບຽບກົດໝາຍ​ຂອງ​ລັດຕາມພາລະບົດບາດ, ສິດໜ້າທີ່ ແລະ ຄວາມຮັບຜິດຊອບຂອງພະນັກງານ-ລັດຖະກອນ ແລະ ຄົ້ນຄ້ວາພິຈາລະນາຄໍາຮ້ອງຟ້ອງ-ຄໍາສະເໜີ ຂອງບຸກຄົນ ຫຼື ການຈັດຕັ້ງ; ປະສານສົມທົບກັບພາກສ່ວນຕ່າງໆທີ່ກ່ຽວຂ້ອງເພື່ອຕ້ານ ແລະ ສະກັດກັ້ນການສໍ້ລາດບັງຫຼວງ, ການປະຕິບັດນະໂຍບາຍປະຢັດ ແລະ ຕ້ານການຟູມເຟືອຍ;
  14. ​ສະຫຼຸບ​ສັງ​ລວມ ແລະ ລາຍງານການເຄື່ີອນໄຫວວຽກງານ ຂອງຂະແໜງ ໃຫ້ຄະນະພັກເປັນປົກກະຕິ;
  15. ປະຕິບັດໜ້າທີ່ອື່ນໆ ຕາມການມອບໝາຍ ຂອງຄະນະ​ພັກ, ຄະ​ນະ​ໂຄ​ສະ​ນາ​ອົບ​ຮົມ​ແຂວງ ​ແລະ ຂັ້ນ​ເທີ​ງ.

ມາດຕາ 8 ຂະແໜງໂຄສະນາ ແລະ ຜ່ານສື່ ມີໜ້າທີ:

  1. ຄົ້ນຄວ້າ, ເຊື່ອມຊືມ​​, ກຳ​ແໜ້ນແນວທາງ​ນະ​ໂຍບາຍ ​ຂອງ​ພັກ-ກົດໝາຍ ຂອງລັດ ​ແລະ ແຜນຍຸດທະສາດ ຂອງຄະນະໂຄສະນາອົບຮົມແຂວງ ກ່ຽວກັບວຽກງານໂຄສະນາ-ປາຖະກະຖາ, ໂຄສະນາ-ຜ່ານສື່ ແລະ ໂຄ​ສະ​ນາ-ເຄື່ອນທີ;
  2. ​​ເປັນ​ເສ​ນາ​ທິ​ການ​ໃຫ້​ແກ່​ຄະ​ນະ​ພັກ​ໃນ​ການ​ໂຄສະນາ​ເຜີ​ຍແຜ່​ແນວ​ທາງນະ​ໂຍບາຍ​ ຂອງ​ພັກ-​ລັດ, ​ຜົນ​ສຳ​ເລັດ​ ຂອງ​ການ​ຈັດ​ຕັ້ງ​ປະ​ຕິ​ບັດ​ແນວ​ທາງ​ນະ​ໂຍ​ບາຍ​ ຂອງ​ພັກ-ລັດ ແລະ ສະ​ພາບ​ພົ້ນ​ເດັ່ນ​ທາງ​ພາຍ​ໃນ ແລະ ​ຕ່າງ​ປະ​ເທດ;
  3. ຕິດ​ຕາມ, ກວດ​ກາ ແລະ ຊຸກ​ຍູ້​ການໂຄ​ສະ​ນາ-​ປາ​ຖະ​ກະ​ຖາ​ເລົ່າ​ມູ​ນ​ເຊື້ອ ຂອງ​ຊາດ, ຂອງພັກ, ຂອງ​ກອງ​ທັບ, ວັນ​ຄ້າຍວັນເກີດ​ ຂອງ​ທ່ານ​ຜູ້​ນຳ, ເຫດ​ການ​ພົ້ນ​ເດັ່ນ​ທາງ​ພາຍ​ໃນ ແລະ​ ຕ່າງ​ປະ​ເທດພ້ອມ​ທັງ​ສັງ​ລວມ​ຂໍ້​ມູນ​ຜົນ​ສຳ​ເລັດ​ດັ່ງ​ກ່າວລາຍ​ງານ​ໃຫ້​ຄະ​ນະ​ພັກ​ຮັບ​ຊາບເປັນ​ປົກ​ກະ​ຕິ;
  4. ປະສານສົມທົບກັບພາກສ່ວນທີ່ກ່ຽວຂ້ອງໃນການຄົ້ນຄວ້າ, ປັບປຸງເອກະສານຮັບໃຊ້ໃຫ້ແກ່ການໂຄສະນາ-ປາຖະກະຖາ, ເລົ່າມູນເຊື້ອວັນສຳຄັນຕ່າງໆ ເຮັດໃຫ້ເນື້ອໃນອຸດົມສົມບູນ, ສອດຄ່ອງກັບສະພາບຄວາມເປັນຈິງແຕ່ລະໄລຍະ;
  5. ສ້າງແຜນເຄື່ອນໄຫວໃຫ້ແກ່ຄະນະພັກໃນການໂຄສະນາ-ປາຖະກະຖາ, ໂຄສະນາເຄື່ອນທີ່ ໃຫ້ແຕ່ລະກົມກອງ, ສະຖາບັນການສຶກສາ ແລະ ທ້ອງຖິ່ນໂດຍ​ນຳ​ເອົາ​ບັນ​ດາ​ມະ​ຕິ, ຄຳ​ສັ່ງ, ແນວ​ທາງ​ນະ​ໂຍ​ບາຍ ​ຂອງ​ພັກ, ລະ​ບຽບ​ກົດ​ໝາຍ ​ຂອງ​ລັດ ແລະ ​ຕອບ​ຕ້ານ​ການ​ໂຄ​ສະ​ນາ​ໃສ່​ຮ້າຍ​ປ້າຍ​ສີ​ຕໍ່​ການ​ນຳ, ແນວ​ທາງ​ ຂອງ​ພັກ-ລັດ ​ໃຫ້​ທັນ​ກັບ​ເວ​ລາ;
  6. ຄົ້ນຄ້ວາ, ຮ່າງບັນດານິຕິກຳ ຂອງວຽກງານໂຄສະນາ-ປາຖະກະຖາ ເປັນຕົ້ນແມ່ນ: ບົດປາໄສ, ບົດແນະນຳ, ຄຳສັ່ງ, ແຈ້ງການ, ແຈ້ງເຊີນເພື່ອ​ນຳສະເໜີໃຫ້ຄະນະພັກຂັ້ນເທິງເປັນຜູ້​ພິ​ຈາ​ລະ​ນາ ແລະ ຕົກລົງ;
  7. ເປັນ​ເຈົ້າການ​ໂຄສະນາ​ເຜີຍ​ແຜ່ສາລະຄະດີຕ່າງໆ ( ສາຍຮູບເງົາ )ໃຫ້ບັນດາພະແນກການ, ກົມກອງ, ສະຖາບັນການສຶກສາ ແລະ ທ້ອງຖິ່ນ, ຮາກຖານ​ໄດ້​ຮັບ​ຮູ້​ຢ່າງ​ທົ່ວ​ເຖິງ;
  8. ສ້າງແຜນຝຶກອົບຮົມຄວາມຮູ້ພື້ນຖານກ່ຽວກັບວຽກງານໂຄສະນາ-ປາຖະກະຖາໃຫ້ພະນັກງານຫຼັກແຫຼ່ງ ຂັ້ນແຂວງ ເມືອງ, ນະ​ຄອນ;
  9. ຕິດຕາມ, ກວດກາຊຸກຍູ້ວຽກງານຜ່ານສື່ ແລະ ກວດກາເນື້ອໃນຂ່າວ ( ບັນນາທິການຂ່າວ ); ພົວພັນປະສານງານກັບນັກຂ່າວ, ​ເກັບກຳ​ຂ່າວ, ຖ່າຍພາບ, ຕັດຕໍ່, ຂຽນຂ່າວ, ສ້າງໂຄງ​ຮ່າງ​ຂ່າວ, ອ່ານຂ່າວ, ອອກຂ່າວ, ສົ່ງຂ່າວໃຫ້ວິທະຍຸໂທລະພາບ, ໜັງສືພິມ ແລະ ທາງເວບ​ໄຊ ​ຂອງ​ຄະ​ນະ​ໂຄ​ສະ​ນາ​ອົບ​ຮົມ​ແຂວງ​ເປັນ​ປົກ​ກະ​ຕິ;
  10. ປະສານສົມທົບກັບຄະນະໂຄສະນາອົບຮົມເມືືອງ, ນະ​ຄອນໃນການເຄື່ອນໄຫວວຽກງານໂຄສະນາເຄື່ອນທີ່  ໃຫ້ເປັນປົກກະຕິ ຕິດພັນກັບການເກັບກຳຂ່າວຂອງຄອບຄົວຕົວແບບດ້ານຕ່າງໆ ໃນແຕ່ລະປີ;
  11. ສຳ​ເນົ່າຂໍ້​ມູນ​​ຕ່າງໆ ຂອງ​ຂະ​ແໜງ ເພື່ອ​​ສະ​ໜອງ​​ແກ່​ພາກ​ສ່ວນ​ທີ່​ກ່ຽວ​ຂ້ອງໃຫ້​ສະ​ດວກ, ວ່ອງ​ໄວ ແລະ​ ຮັບ​ປະ​ກັນ​ບໍ່​ໃຫ້​ຕົກ​ເຮ່ຍ​ເສຍ​ຫາຍ;
  12. ເປັນ​ເຈົ້າ​ການຈັດຕັ້ງປະຕິບັດວຽກງານປ້ອງ​ກັນ​ຊາດ-ປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍພາຍໃນສໍານັກງານ-ອົງການ;
  13. ​ສະຫຼຸບ​ສັງ​ລວມ ແລະ ລາຍງານການ​ເຄື່ອນ​ໄຫວ​ວຽກງານ​ ຂອງ​ຂະ​ແໜງ​ໃຫ້​ຄະນະ​​​ພັກ, ຄະ​ນະ​ໂຄ​ສະ​ນາ​ອົບ​ຮົມ​ແຂວງເປັນ​ປົກກະ​ຕິ;
  14. ປະຕິບັດໜ້າທີ່ອື່ນໆຕາມການມອບໝາຍ ຂອງຄະນະ​ພັກ, ຄະ​ນະ​ໂຄ​ສະ​ນາ​ອົບ​ຮົມ​ແຂວງ ​ແລະຂັ້ນ​ເທີ​ງ.

ມາດຕາ 9 ຂະແໜງອົບຮົມ ມີໜ້າທີ:

  1. ຄົ້ນ​ຄ​ວ້​າ,ເຊື່ອມ​ຊຶມ​​, ກຳ​ແໜ້ນແນວທາງ​ນະ​ໂຍບາຍ​ຂອງ​ພັກ-ກົດໝາຍຂອງ​ລັດ ​ແລະ ແຜນ​ຍຸດ​ທະ​ສາດ ຂອງ​ຄະ​ນະ​ໂຄ​ສະ​ນາ​ອົບ​ຮົມ​ແຂວງ ກ່ຽວ​ກັບ​ວຽກ​ງານ​ອົບ​ຮົມ​ໃນ​ແຕ່​ລະ​ໄລ​ຍະ;
  2. ຄົ້ນ​ຄວ້າ​ເນື້ອ​ໃນ​ມະ​ຕິ, ຄຳ​ສັ່ງ, ແນວ​ທາງ​ນະ​ໂຍ​ບາຍຂອງ​ພັກ, ກົດ​ໝາຍ​ຂອງ​ລັດ, ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມແຫ່ງ​ຊາດໃຫ້​ສອດ​ຄ່ອງ​ກັບຈຸດ​ພິ​ເສດ ເພື່ອຫັນມາເປັນເອກະສານ ແລະ ເປັນຄູ່ມືຮັບໃຊ້ໃຫ້ແກ່ການ​ອົບ​ຮົມແຕ່ລະເປົ້າໝາຍ;
  3. ເປັນ​ເສ​ນາ​ທິ​ການ​​ໃຫ້​ແກ່​ຄະ​ນະ​ພັກ, ຄະ​ນະ​ໂຄ​ສະ​ນາ​ອົບ​ຮົມ​ແຂວງໃນ​ການ​ຂຶ້ນ​ແຜນ​ອົບ​ຮົມເປັນ​ຕົ້ນ​ແມ່ນອົບ​ຮົມ​ຄວາມ​ຮູ້​ພື້ນ​ຖານການ​ສ້າງ​ບ້ານ​ພັດ​ທະ​ນາ, ມະ​ຫາ​ຊົນຜູ້​ກ້າວ​ໜ້າ, ສະ​ມາ​ຊິກ​ພັກ​ໃໝ່, ນັກ​ສຶກ​ສາ​ທີ່​ຮຽນ​ຈົບ​ມາ​ຈາກ​ຕ່າງ​ປະ​ເທດ, ພະ​ນັກ​ງານ-ສະ​ມາ​ຊິກ​ພັກ​ທົ່ວ​ໄປ, ນັກ​ທຸ​ລະ​ກິດ, ​ເຈົ້າ​ກົກເຈົ້າ​ເຫຼົ່າແລະອົບ​ຮົມ​ໃຫ້​ປະ​ຊາ​ຊົນ​ທີ່​ຢູ່​ລຽບ​ຕາມ​ຊາຍ​ແດນ;
  4. ປະ​ສານ​ສົມ​ທົບ​ກັບ​ພະ​ແນກ​ສຶ​ກ​ສາ​ທິ​ການ ແລະ ກິ​ລາ​ແຂ​ວງໃນ​ການຕິດ​ຕາມ, ກວດ​ກາ ແລະ ​ຊຸກ​ຍູ້​ການ​ຮຽນ​ການ​ສອນ​ວິ​ຊາ​ສຶກ​ສາ​ພົນ​ລະ​ເມືອງ, ວິ​ທະ​ຍາ​ສາດ-ສັງ​ຄົມຢູ່​ສະ​ຖາ​ບັນ​ການ​ສຶກ​ສາ​ຕ່າງໆ;
  5. ປະ​ສານ​ສົມ​ທົບ​ກັບ​ພາກ​ສ່ວນ​ທີ່​ກ່ຽວ​ຂ້ອງ ​( ສູນ​ກາງແລະ​ທ້ອງ​ຖິ່ນ ) ກ່ຽວ​ກັບ​ວຽກ​ງານ​ອົບ​ຮົມ​ການ​ເມືອງ-ການ​ປົກ​ຄອງ ແລະ ​ການ​ສ້າງ​ບ້ານ​ພັດ​ທະ​ນາໃຫ້​ພະ​ນັກ​ງານຫຼັກ​ແຫຼ່ງ​ຂັ້ນ​ເມືອງ, ນະ​ຄອນ ແລະ​ ຂັ້ນ​ບ້ານ;
  6. ກະ​ກຽມ​ເນື້ອ​ໃນແລະ​ເງື່ອນ​ໄຂ​ ເພື່​ອ​ຈັດ​ຝຶກ​ອົບ​ຮົມວຽກ​ງານ​ການ​ເມືອງ-ແນວ​ຄິດໃຫ້ພະນັກງານ, ສະມາຊິກພັກ, ຄະນະພັກຮາກຖານຂັ້ນ​ຕ່າງໆ ພ້ອມ​ທັງຈັດ​ຕັ້ງ​ຮຽນ​ເອ​ກະ​ສານ​ສະ​ໜັບ​ສະ​ໜູນ​ໃຫ້​ມະ​ຫາ​ຊົນ​ຜູ້​ກ້າວ​ໜ້າ, ອົບ​ຮົມ​ສະ​ມາ​ຊິກ​ພັກ​ໃໝ່ ໃຫ້​ແກ່​ເປົ້າ​ໝາຍ​ຕ່າງໆ;
  7. ປະ​ສານ​ສົມ​ທົບ​ກັບ​ພາກ​ສ່ວນ​ທີ່​ກ່ຽວ​ຂ້ອງ​ໃນ​ການຕິດຕາມ, ກວດກາ, ​ປະ​ເມີນ​ຄືນກ່ຽວ​ກັບ​ມະ​ຫາ​ຊົນ​ຜູ້​ກ້າວ​ໜ້າທີ່​ໄດ້​ຜ່ານ​ການ​ຮຽນ​ສະ​ໜັບ​ສະ​ໜູນແລ້ວພ້ອມ​ທັງຂຶ້ນ​ບັນ​ຊີນັກສຳມະນາກອນ ​ຜູ້​ທີ່​ໄດ້ຮັບ​ໃບ​ຢັ້ງ​ຢືນໃນການ​ຝຶກອົບຮົມ ໂດຍ​ຜ່ານ​ການ​ເຫັນດີ​​ຂອງ​ຄະ​ນະ​ພັກ;
  8. ສຳ​ເນົ່າຂໍ້​ມູນ​​ຕ່າງໆ ຂອງ​ຂະ​ແໜງ ເພື່ອ​​ສະ​ໜອງ​​ແກ່​ພາກ​ສ່ວນ​ທີ່​ກ່ຽວ​ຂ້ອງໃຫ້​ສະ​ດວກ, ວ່ອງ​ໄວ ແລະ ​ຮັບ​ປະ​ກັນ​ບໍ່​ໃຫ້​ຕົກ​ເຮ່ຍ​ເສຍ​ຫາຍ;
  9. ​ສະ​ຫຼຸບຖອດ​ຖອນ​ບົດ​ຮຽນ ແລະ ​ລາຍ​ງານ​ການ​ຈັ​ດ​ຕັ້ງ​ປະ​ຕິ​ບັດ​ວຽກ​ງານ​ອົບ​ຮົມ​​ໃຫ້​ຄະ​ນະ​ພັກ​ຂັ້ນ​ເທີງ;
  10. ປະ​ສານ​ງານ​ກັບ​ພາກ​ສ່ວນ​ທີ່​ກ່ຽວ​ຂ້ອງເປັນ​ຕົ້ນ​ແມ່ນ​ນັກ​ວິ​ທະ​ຍາ​ກອນ(ຄູ) ​ເພື່ອ​ອຳ​ນວຍ​ຄວາມ​ສະ​ດວກ​ໃຫ້​ແກ່​ວຽກ​ງານ​ອົບ​ຮົມ;
  11. ເປັນ​ເຈົ້າ​ການຈັດຕັ້ງປະຕິບັດວຽກງານປ້ອງ​ກັນ​ຊາດ-ປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍພາຍໃນສໍານັກງານ-ອົງການ;
  12. ສະຫຼຸບ​ສັງ​ລວມ ແລະ ລາຍງານການ​ເຄື່ອນ​ໄຫວ​ວຽກງານ ​ຂອງ​ຂະ​ແໜງ​ໃຫ້​ຄະນະ​​​ພັກເປັນ​ປົກກະ​ຕິ;
  13. ປະ​ຕິ​ບັດ​ໜ້າ​ທີ່​ອຶ່ນໆ ຕາມ​ການມອບ​ໝາຍຂອງ​ຄະ​ນະພັກ, ຄະ​ນະ​ໂຄ​ສະ​ນາ​ອົບ​ຮົມ​ແຂວງ ​ແລະ ຂັ້ນ​ເທີ​ງ.

 

 

ມາດຕາ 10 ຂະແໜງຄົ້ນຄ້ວາ-ສັງລວມ ເກັບກຳຫາງສຽງສັງຄົມ ມີໜ້າທີ:

  1. ຄົ້ນ​ຄວ້າ, ເຊື່ອມ​ຊຶມ, ກຳ​ແໜ້ນແນວທາງນະໂຍບາຍ ຂອງ​ພັກ, ລະບຽບກົດໝາຍ​ ຂອງ​ລັດ ແລະ ແຜນພັດທະນາເສດ ຖະກິດ-ສັງຄົມ, ແຜນ​ຍຸດ​ທະ​ສາດ ຂອງ​ຄະ​ນະ​ໂຄ​ສະ​ນາ​ອົບ​ຮົມ​ແຂວງ ກ່ຽວ​ກັບ​ວຽກ​ງານ​ຄົ້​ນ​ຄວ້າ-ສັ​ງ​ລວມ ເກັບ​ກຳ​ຫາງ​ສຽງ​ສັງ​ຄົມ​​ໃນແຕ່ລະໄລ​ຍະ​;
  2. ເປັນເສນາທິການໃນ​ການ​ຄົ້ນ​ຄວ້າ​ສ້າງ​ນິ​ຕິ​ກຳ​ຕ່າງໆເປັນ​ຕົ້ນ​ແມ່ນມະ​ຕິ, ຄຳ​ສັ່ງ, ຂໍ້​ຕົກ​ລົງ, ຄຳ​ແນະ​ນຳ, ບົດ​ແນະ​ນຳ, ແຈ້ງ​ການ, ແຈ້ງ​ເຊີນ, ບົດ​ຄວາມ​ເຫັນ, ຮ່າງ​ບົດ​ລາຍ​ງານ, ບົດ​ປາ​ໄສ, ບົດ​ກ່າວ​ເປີດ-ປິດ, ບົດ​ໂອ້​ລົມ, ບົດ​ບັນ​ທຶກ ແລະ​ ອື່ນໆ ໃຫ້ແກ່ຄະນະພັກ, ຄະນະໂຄສະນາອົບຮົມ​ແຂວງ;
  3. ສະຫລຸບສັງລວມວຽກງານຮອບດ້ານ​ໃນ​ການເຄື່ອນໄຫວປະຈໍາອາທິດ, ປະຈໍາເດືອນ, ປະຈໍາ3ເດືອນ, 6 ເດືອນ ແລະ ປະຈໍາປີພ້ອມທັງວາງທິດທາງແຜນການ ແລະລາຍງານໃຫ້ຄະນະພັກ, ຄະນະປະຈໍາພັກແຂວງ ແລະຄະນະໂຄສະນາອົບຮົມສູນກາງພັກ​ເປັນ​ປົກ​ກະ​ຕິ;
  4. ສ້າງ​ແຜນເຝິກອົບຮົມ​ວຽກ​ງານ​ຄົ້ນ​ຄວ້າ​-ສັງ​ລວມ, ວຽກງານຫາງສຽງສັງຄົມໃຫ້​ແກ່​ພະ​ນັກ​ງານ​-ລັດ​ຖະ​ກອນ ພາຍ​ໃນ​​ຄະ​ນະ​ໂຄ​ສະ​ນາ​ອົບຮົມ​ແຂວງ, ບັນ​ດາ​ພະ​ແນກ​ການ, ກົມ​ກອງ, ສະ​ຖາ​ບັນ​ການ​ສຶກ​ສາ, ເມືອງ, ນະຄອນ;
  5. ສ້າງແຜນການໃຫ້ຄະນະໄດ້ລົງເຄື່ອນໄຫວໂຄສະນາເຜີຍແຜ່ວຽກງານຫາງສຽງສັງຄົມ ແລະ ​ຈັດ​ຕັ້ງ​ຕາ​​ໜ່າງ​ເພື່ອນ​ຮ່ວມ​ງານຢູ່ບັນດາພະແນກການ, ກົມ​ກອງອ້ອມຂ້າງແຂວງ, ສະຖາບັນການສຶກສາ ແລະລັດວິສາຫະກິດຕ່າງໆ ​ໃຫ້​ກວ້າງ​ຂວາງ;
  6. ສະຫຼຸບຖອດຖອນບົດຮຽນ, ປະເມີນຜົນວຽກງານຫາງສຽງສັງຄົມໃນແຕ່ລະປີ;
  7. ພົວ​ພັນ​ປະ​ສານ​ສົມ​ທົບ​ກັບ​ພາ​ກ​ສ່ວນ​ທີ່​ກ່ຽວ​ຂ້ອງນັບ​ແຕ່​ສູນ​ກາງ, ແຂວງ ແລະ ທ້ອງ​ຖິ່ນ​ຮາກ​ຖານ​ເພື່ອເກັບກໍາສະ ພາບກະແສແນວຄິດ, ຫາງສຽງສັງຄົມ, ຖ້ອຍທໍານອງ, ຂ່າວລືຕ່າງໆຢູ່ພາຍໃນ ແລະ ຕ່າງປະເທດ;
  8. ສຳເນົ່າຂໍ້ມູນຕ່າງໆ ຂອງຂະແໜງ ເພື່ອສະໜອງແກ່ພາກສ່ວນທີ່ກ່ຽວຂ້ອງໃຫ້ສະດວກ, ວ່ອງໄວ ແລະ ຮັບປະກັນບໍ່ໃຫ້ຕົກເຮ່ຍເສຍຫາຍ;
  9. ເປັນ​ເຈົ້າ​ການຈັດຕັ້ງປະຕິບັດວຽກງານປ້ອງ​ກັນ​ຊາດ-ປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍພາຍໃນສໍານັກງານ-ອົງການ;
  10. ສະຫຼຸບ​ສັງ​ລວມ ແລະ​ ລາຍ​ງານວຽກ​ງານ​ເກັບ​ກຳ​ຫາງ​ສຽງ​ສັງ​ຄົມໃຫ້​ຄະ​ນະ​ພັກ​ຂັ້ນ​ເທິງ​ເປັນ​ປົກ​ກະ​ຕິ;
  11. ປະຕິບັດໜ້າທີ່ອື່ນໆ ຕາມການມອບໝາຍ ຂອງຄະນະພັກ, ຄະ​ນະ​ໂຄ​ສະ​ນາ​ອົ​ບ​ຮົມ​ແຂວງ ​ແລະຂັ້ນ​ເທີ​ງ.​

ໝວດທີV

ວ່າດ້ວຍຫຼັກການ ແລະ ແບບແຜນວິທີເຮັດວຽກ

ມາດຕາ 11  ຫຼັກການ

        ຄະນະໂຄສະນາອົບຮົມແຂວງເຄື່ອນໄຫວຕາມຫຼັກການດັ່ງນີ້:

1.ປະຕິບັດ​ຕາມ​ຫຼັກ​ການລວມສູນ​ປະຊາທິປະ​ໄຕຕົກລົງ​ເປັນ​ໝູ່​ຄະນະແບ່ງ​ງານ​ໃຫ້​ບຸກ​ຄົນ​ຮັບ​ຜິດ​ຊອບໃນ​ການ​ຈັດ​ຕັ້ງ​ປະ​ຕິ​ບັດ​ໜ້າ​ທີ່​ວຽກ​ງານ, ປະຕິບັດ​ລະບອບ​ຫົວໜ້າ​ດຽວບົນ​ພື້ນຖານ​ການ​​ເສີມ​ຂະຫຍາຍ​ຫົວຄິດ​ປະດິດ​ສ້າງ​ຂອງ​ພະນັກງານ-ລັດ​ຖະກອນ​;

2.ການ​ເຄື່ອນ​ໄຫວວຽກງານ​ແມ່ນ​ອີງ​ໃສ່​ແນວທາງ​ນະ​ໂຍບາຍ​ຂອງ​ພັກ ​ແລະກົດໝາຍຂອງ​ລັດ, ລະບຽບ,ຫຼັກການ; ນໍາ​ເອົາ​ແຜນການ​ປະ​ຈໍາປີ, ​ແຜນ 5 ປີ​ຂອງ​ແຂວງ,​ຂອງຄະນະ​ໂຄສະນາ​ອົບຮົມ​ສູນ​ກາງ​ພັກມາ​ຈັດຕັ້ງຜັນ​ຂະຫຍາຍ​ໃຫ້​ໄດ້​ຮັບ​ຜົນ​ດີ.​

 

ມາດຕາ 12 ແບບ​​ແຜນວິທີເຮັດວຽກ.

        ຄະນະໂຄສະນາອົບຮົມແຂວງມີແບບແຜນວິທີເຮັດວຽກດັ່ງນີ້:

1. ​ເຮັດ​ວຽກ​ຢ່າງ​ມີ​ແຜນການ, ​ໂຄງ​ການ, ກິດ​ຈະ​ກຳ, ແກ້​ໄຂວຽກ​ງານຢ່າງ​ມີຈຸດ​ສຸມ, ​ມີ​ເປົ້າ​ໝາຍ​ໃນ​ແຕ່​ລະ​ໄລ​ຍະ; ມີ​ການ​ປະ​ສານ​ສົມ​ທົບ​ກັບ​ພາກ​ສ່ວນ​ກ່ຽວ​ຂ້ອງເພື່ອ​ຮັບ​ປະ​ກັນ​ໃນ​ການ​ຈັດ​ຕັ້ງ​ປະ​ຕິ​ບັດ​ໃຫ້​ໄດ້​ຮັບ​ຜົນ​ດີ;

2. ​ເຮັດ​ວຽກມີ​ການ​ຊຸກຍູ້, ​ຕິດຕາມ, ​ກວດກາ, ປະ​ເມີນ​ຜົນພ້ອມ​ທັງສະຫຼຸບ​,ຖອດ​ຖອນ​ບົດຮຽນ​ເປັນ​ແຕ່ລະ​ໄລຍະ​;

3. ປະຕິບັດ​ລະບອບ​ປະຊຸມ​ປະຈຳ​ອາທິດ, ປະຈຳ​ເດືອນ, 3​ ເດືອນ, 6​ ເດືອນ ​ແລະ 1​ ປີ ​ເພື່ອ​ລາຍ​ງານ​ສະພາບ​ການຈັດ​ຕັ້ງ​ປະຕິບັດ​ວຽກ​ງານ​ ​ໃຫ້​ຂັ້ນ​ເທິງ​ຮັບ​ຊາບເປັນ​ປົກກະຕິ.

ໝວດທີVI

ວ່າດ້ວຍບົດບັນຍັດສຸດທ້າຍ

ມາດຕາ 13 ງົບປະມານ ແລະ ຕາປະທັບ

ຄະນະ​ໂຄສະນາ​ອົບຮົມ​ແຂວງ​ ​ມີ​​ງົບປະມານ​ຂອງ​ລັດ​ແຕ່​ລະ​ປີ​ແລະ​ມີຕາ​ປະ​ທັບຂອງ​ຕົນ​​ເພື່ອນຳໃຊ້ເຂົ້າໃນການເຄື່ອນໄຫວວຽກງານວິຊາສະເພາະ ແລະ ວຽກງານທາງລັດຖະການ.

ມາດຕາ 14 ການຈັດຕັ້ງປະຕິບັດ

ຄະນະ​ໂຄສະນາ​ອົບຮົມ​ແຂວງ, ຫ້ອງ​ວ່າການປົກຄອງ​ແຂວງ, ບັນດາ​ພະ​ແນ​ກການ​, ອົງການ​ຂັ້ນ​ແຂວງ, ​ຂັ້ນເມືອງ,ນະຄອນແລະພາກສ່ວນ​ທີ່​ກ່ຽວຂ້ອງ​ຈົ່ງ​ຮັບ​ຮູ້ ​ແລະຈັດ​ຕັ້ງ​ປະຕິບັດ​ມະຕິ​ຕົກລົງ​ສະບັບ​ນີ້​ຢ່າງ​ເຂັ້ມ​ງວດ.

ມາດຕາ 15 ຜົນສັກສິດ

ມະຕິ​ຕົກລົງ​ສະບັບ​ນີ້​ມີ​ຜົນ​ສັກສິດ​ນັບ​ແຕ່​ມື້​ລົງ​ລາຍ​ເຊັນ​ເປັນ​ຕົ້ນ​ໄປ ​ແລະປ່ຽນ​ແທນ​ມະຕິ​ຕົກລົງ​ສະບັບ​ເລກ​ທີ232/ຄປພຂ.ຫຼບ, ​ລົງ​ວັນ​ທີ 15 ສິງຫາ(08) 2014.

                                                    .ຄະນະປະຈຳພັກແຂວງຫຼວງພະບາງ

                                                                             ເລຂາ

 

 

 

 

 

 

ຊົມເຊີຍວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 40 ປີ

ວີດີໂອ....

ເຊື່ອມຕໍ່ເວບໄຊ້ທ

ເລກໂທ ສຸກເສີນ

ແຈ້ງໄຟໄໝ້:   1190
ຕຳຫຼວດ:       1191
ລົດໂຮງໝໍ:    1195
ໄຟຟ້າ:          1199
ນໍ້າປະປາ:      1169

ຈຳນວນຄົນອອນໄລ໌ທ

ມີ 11  ຂາສັນຈອນ ແລະ ບໍ່ມີສະມາຊິກອອນໄລນ໌ ອອນໄລນ໌

ສະຖິຕິຜູ້ເຂົ້າຊົມ:

126633
ມື້ນີ້ມື້ນີ້166
ມື້ວານນີ້ມື້ວານນີ້283
ອາທິດນີ້ອາທິດນີ້354
ເດືອນນີ້ເດືອນນີ້5793
ທັງໝົດທັງໝົດ126633