ເຊື່ອມຊຶມວຽກງານສັງລວມ-ຫາງສຽງສັງຄົມ ທີ່ ເມືອງນ້ຳບາກ, ແຂວງຫຼວງພະບາງ.

ສ້າງຂື້ນເມື່ອ ວັນພະຫັດ, 09 ກັນຍາ 2021 02:37
ຂຽນໂດຍ ສຸດທະວີໄຫວ ມີທະວົງ

      ລະຫວ່າງທ້າຍ ເດືອນສິງຫາ 2021 ຜ່ານມານີ້ ຢູ່ທີ່ຫ້ອງປະຊຸມ ຂອງ ຄະນະໂຄສະນາອົບຮົມເມືອງນ້ຳບາກ ໄດ້ຈັດພິທີເຊື່ອມຊຶມເອກະສານສັງລວມ-ຫາງສຽງສັງຄົມ ໂດຍການເປັນປະທານ ຂອງ ສະຫາຍ  ຄໍາສະໝອນ ເພັດດາລາ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ, ມີ ສະຫາຍ ສົມຈິດ ສິງລໍຄໍາ ຮອງຫົວໜ້າຄະນະໂຄສະນາອົບຮົມແຂວງ, ມີບັນດາພະນັກງານ, ສະມາຊິກພັກອ້ອມຂ້າງເມືອງເຂົ້າຮ່ວມ.

     ພິທີ ສະຫາຍ ບຸນທຽບ ລາດສະວົງ ຮັກສາການ ຫົວໜ້າຄະນະໂຄສະນາອົບຮົມເມືອງ ຂຶ້ນຜ່ານຄໍາສັ່ງແນະນໍາ ຂອງ ຄະນະປະຈຳພັກແຂວງຫຼວງພະບາງ ສະບັບເລກທີ 06/ຄປພຂ, ລົງວັນທີ 31 ສິງຫາ 2017 ວ່າດ້ວຍການເພີ້ມທະວີຕິດຕາມ, ເກັບກຳສະພາບແນວຄິດ-ຫາງສຽງສັງຄົມໃນໄລຍະໃໝ່, ສະຫາຍ ຄຳສະໝອນ ເພັດດາລາ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ ຂຶ້ນຜ່ານຂໍ້ກຳນົດ ຂອງ ຄະນະປະຈຳພັກແຂວງຫຼວງພະບາງ ສະບັບເລກທີ 07/ຄປພຂ, ລົງວັນທີ 22 ກໍລະກົດ 2020 ວ່າດ້ວຍການຈັດຕັ້ງການເຄື່ອນໄຫວ ຂອງເພື່ອນຮ່ວມງານ ເກັບກໍາສະພາບແນວຄິດ-ຫາງສຽງສັງຄົມ ຢູ່ ແຂວງຫຼວງພະບາງ.

     ຈາກນັ້ນ ສະຫາຍ ສົມຈິດ ສິງລໍຄຳ ຮອງຫົວໜ້າຄະນະໂຄສະນາອົບຮົມແຂວງ ຂຶ້ນເຜີຍແຜ່ເອກະສານສັງລວມ-ຫາງສຽງສັງຄົມ ໂດຍຍົກໃຫ້ເຫັນບັນຫາຫາງສຽງທີ່ສຳຄັນຄື: ການແກ້ໄຂທັດສະນະທ່າອ່ຽງໃນການປະພຶກທີ່ລະເມີດຕໍ່ລະບຽບຂອງພັກ ແລະ ພຶກຕິກຳຕົວຈິງທີ່ສະແດງອອກໃນການກະທຳ, ການເຄື່ອນໄຫວດ້ານແນວຄິດ, ຈິນຕະນາການຂອງບຸກຄົນ, ນິຕິບຸກຄົນ ການຈັດຕັ້ງຢູ່ໃນສັງຄົມທັງດ້ານບວກ ແລະ ດ້ານລົບ, ທີ່ມີລັກສະນະແຜ່ລາມ, ລວມທັງການສວຍໃຊ້ໂອກາດ ຂອງ ກຸ່ມຄົນບໍ່ຫວັງດີໃນການເຄື່ອນໄຫວໂຄສະນາບິດເບືອນຄວາມຈິງ.

    ຕອນທ້າຍ ສະຫາຍ ຄໍາສະໝອນ ເພັດດາລາ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ ມີຄໍາເຫັນເນັ້ນໜັກຕື່ມໃຫ້ພະນັກງານ-ສະມາຊິກພັກ ທຸກຂົງເຂດວຽກງານຂອງເມືອງ, ພ້ອມກັນເົອາໃຈໃສ່ຈັດຕັ້ງປະຕິບັດວຽກງານຫາງສຽງສັງຄົມໃຫ້ເຂົ້າສູ່ຊີວິດຕົວຈິງ, ໃນການຈັດຕັ້ງປະຕິບັດ ມະຕິ XI ຂອງພັກ, ມະຕິ VII ຂອງອົງຄະນະພັກແຂວງ, ມະຕິ IX ຂອງອົງຄະນະພັກເມືອງນໍ້າບາກ ຕິດພັນກັບມະຕິຂອງໜ່ວຍພັກຂັ້ນຂອງຕົນວາງອອກ, ໃນນັ້ນວຽກງານເກັບກຳຫາງສຽງສັງຄົມ ຖືເປັນວຽກໜຶ່ງທີ່ສຳຄັນ ໄດ້ຕິດພັນກັບການເຄື່ອນໄຫວຕົວຈິງ ເພາະພັກເຮົາຍາມໃດ ກໍ່ຖືເອົາວຽກງານການເມືອງ-ແນວຄິດ ເປັນວຽກງານກົກສອດຫ້ອຍເຂົ້າໃນທຸກຂົງເຂດວຽກງານ ມີຄວາມສໍາຄັນ ແລະ ທ້າທາຍຕໍ່ການນຳພາຂອງພັກ ໂດຍສະເພາະແມ່ນການຄຸ້ມຄອງບໍລິຫານລັດ, ການວາງນະໂຍບາຍໃຫ້ຖືກຕ້ອງ ແລະ ສອດຄ່ອງກັບສະພາບຄວາມເປັນຈິງຂອງທ້ອງຖິ່ນ.