ຂ່າວ ຄະ​ນະ​ໂຄ​ສະ​ນາ​ອົບ​ຮົມ ເມືອງວຽງ​ຄຳ

ລາຍລະອຽດ

ສ້າງຂື້ນເມື່ອ ວັນພຸດ, 27 ມັງກອນ 2021 02:09

ຂຽນໂດຍ ທະ​ນົງ​ສັກ ທຳ​ມະ​ລາດ

ຂ່າວ ຄະ​ນະ​ໂຄ​ສະ​ນາ​ອົບ​ຮົມ ເມືອງວຽງ​ຄຳ ແຂວງ​ຫຼວງ​ພະ​ບາງ

ເຄືອນ​ໄຫວ​ອົບ​ຮົມ​ເປົ້າ​ໝາຍ​ຂະ​ຫຍາຍ​ເຂົ້າ​ພັກ ຢູ່​ຮາກ​ຖານ​ບ້ານ​ພາຍ​ໃນ

   ໃນ​ລະ​ຫວ່າງວັນ​ທີ 22-23 ມັງ​ກອນ ປີ 2021 ຜ່ານ​ມາ​ນີ້ ຄະ​ນະ​ໂຄ​ສະ​ນາ​ອົບ​ຮົມ​ເມືອງວຽງ​ຄຳ ແຂວງ​ຫຼວງ​ພະ​ບາງ ລົງ​ເຄື່ອນ​ໄຫວ ອົບ​ຮົມ​ເປົ້າ​ໝາຍ​ຂະ​ຫຍາຍ​ເຂົ້າ​ພັກ ໃຫ້​ມະ​ຫາ​ຊົນ​ຜູ້​ມີ​ຄວາມ​ກ້າວ​ໜ້າ ປະ​ຈຳ​ງວດ 1 ປີ 2021 ຢູ່​ຮາກ​ຖານ​ບ້ານ​ພາຍ​ໃນ 4 ກຸ່ມ​ພັດ​ທະ​ນາຄື: ກຸ່ມ​ພັດ​ທະ​ນາ​ມົກ​ຄະ, ກຸ່ມ​ພັດ​ທະ​ນາ​ພູ​ສະ​ນາມ, ກຸ່ມ​ພັດ​ທະ​ນາເມືອງ​​ໝ້ວຍ ແລະ ກຸ່ມ​ພດ​ທະ​ນາ​ສົບ​ເຮືອງ ເຊິ່ງ​ພິ​ທີ​ດັ່ງ​ກ່າວ​ໄດ້​ຈັດ​ຂຶ້ນ ທີ່​ຫ້ອງ​ປະ​ຊຸມ​ບ້ານ​ຈຸດ​ສຸມ​ພາຍ​ໃນ​ແຕ່​ກຸ່ມ​ບ້ານ​ພັດ​ທະ​ນາ ໂດຍ​ພາຍ​ໃຕ້​ການ​ນຳ​ພາ ພ້ອມ​ທັງ​ໃຫ້​ກຽດ​ຂຶ້ນ​ບັນ​ຍາຍ​ເອ​ກະ​ສານ​ຂອງ ສະ​ຫາຍ ນາງ ບຸນ​ເລື່ອມ ແກ້ວດວງ​ຈິດ ກຳ​ມະ​ການ​ພັກ​ເມືອງ ຫົວ​ໜ້າ​ຄະ​ນະ​ໂຄ​ສະ​ນາ​ອົບ​ຮົມ​ເມືອງ, ມີ​ບັນ​ດາ​ສະ​ຫາຍ​ເລ​ຂາ, ຮອງ​ເລ​ຂາ​ພັກ​ບ້ານ, ຄະ​ນະ​ບ້ານ ຕະ​ຫຼອດ​ຮອດ​ມະ​ຫາ​ຊົນ​ຜູ້​ທີ່​ມີ​ຄວາມ​ກ້າວ​ໜ້າ ຈຳ​ນວນ 51 ສະ​ຫາຍ, ຍິງ 8 ສະ​ຫາຍ ເຂົ້າ​ຮ່ວມ​ຢ່າງ​ພ້ອມ​ພ​ຽງ.

   ໃນພິ​ທີ ສະ​ຫາຍ ນາງ ບຸນ​ເລື່ອມ ແກ້ວດວງ​ຈິດ ກຳ​ມະ​ການ​ພັກ​ເມືອງ ຫົວ​ໜ້າ​ຄະ​ນະ​ໂຄ​ສະ​ນາ​ອົບ​ຮົມ​ເມືອງ ກໍ່​ໄດ້​ຂຶ້ນ​ບັນ​ຍາຍ​ເອ​ກະ​ສານ ​ຕາມ​ເນື້ອ​ໃນ 11 ຄຳ​ຖາມ 11 ຄຳ​ຕອບ ເພື່ອ​ສ້າງ​ຄວາມ​ຮັບ​ຮູ້​ພື້ນ​ຖານ​ໃຫ້​ມະ​ຫາ​ຊົນ​ຜູ້​ມີ​ຄວາມ​ກ້າວ​ໜ້າ ເປັນ​ຕົ້ນ​ແມ່ນ ປະ​ຫວັດ​ຄວາມ​ເປັນ​ມາ, ອຸ​ດົມ​ການ ແລະ ທາດ​ແທ້​ຂອງ​ພັກ​ປະ​ຊ​າ​ຊົນ​ປະ​ຕິ​ວັດ​ລາວ; ເຂົ້​າ​ໃຈ​ກ່ຽວ​ກັບ​ມາດ​ຖານ, ເງື່ອນ​ໄຂ​ຜູ້​ທີ່​ຈະ​ເຂົ້າ​ເປັນ​ສະ​ມາ​ຊິກ​ພັກ, ພັນ​ທະ ແລະ ຜົນ​ປະ​ໂຫຍດ​ຂອງ​ສະ​ມາ​ຊິກ​ພັກ; ເຮັດ​ໃຫ້​ມະ​ຫາ​ຊົນ​ຜູ້​ກ້າວ​ໜ້າ​ຕັ້ງ​ໜ້າ​ຝຶກ​ຝົນ​ຫຼໍ່​ຫຼອມ​ຕົນ​ເອງ​ໃຫ້​ມີ​ມາດ​ຖານ, ເງື່ອນ​ໄຂ​ຄົບ​ຖ້ວນ ແລະ ມີ​ຄວາມ​ຕື່ນ​ຕົວ​ສະ​ໝັກ​ເຂົ້​າ​ເປັນ​ສະ​ມາ​ຊິກ​ພັກ​ປະ​ຊາ​ຊົນ​ປະ​ຕິ​ວັດ​ລາວ ເພື່ອ​ເພີ່ມ​ກຳ​ລັງ​ແຮງ​ສູ້​ຮົບ​ໃຫ້​ແກ່​ພັກ​ນັບ​ມື້​ນັບ​ຫຼາຍ​ຂຶ້ນ ພ້ອມ​ນັ້ນ, ຍັງ​ໄດ້​ຍົກ​ເອົາ​ບາງ​ຄຳ​ຖາມ​ບາງ​ຄຳ​ຕອບ​ຂຶ້ນ​ມາ ສົນ​ທະ​ນາ​ແລກ​ປ່ຽນ​ບົດ​ຮຽນ, ຄຳ​ຄິດ ຄຳ​ເຫັນ, ອະ​ທິ​ບາຍ, ຊີ້​ແຈ້ງ ແລະ ຍົກ​ຕົວ​ຢ່າງ​ເພີ່ມ​ເຕີມ ເພື່ອ​ເຂົ້າ​ໃຈ​ກະ​ຈ້າງ​ແຈ້ງ​ຂຶ້ນ​ຕື່ມ​ອີກ.

   ໃນ​ຕອນ​ທ້າຍ​ພິ​ທີ ສະ​ຫາຍ ນາງ ບຸນ​ເລື່ອມ ແກ້ວດວງ​ຈິດ ກຳ​ມະ​ການ​ພັກ​ເມືອງ ຫົວ​ໜ້າ​ຄະ​ນະ​ໂຄ​ສະ​ນາ​ອົບ​ຮົມ​ເມືອງ ຍັງ​ໄດ້​ຮຽງ​ຮອງ​ໃຫ້ ມະ​ຫາ​ຊົ​ນ​ຜູ້​ທີ່​ມີ​ຄວາມ​ກ້າວ​ໜ້າ ຈົ່ງ​ນຳ​ເອົາ​ເນື້ອ​ໃນ​ຈິດ​ໃຈ​ບົດ​ຮຽນ​ໃນ​ຄັ້ງ​ນີ້​ໄປ​ຈັດ​ຕັ້ງ​ປະ​ຕິ​ບັດ, ຕັ້ງ​ໜ້າ​ຝຶກ​ຝົນ​ຫຼໍ່​ຫຼອມ​ຕົນ​ເອງ​ທາງ​ດ້ານ​ຄຸນ​ທາດ​ການ​ເມືອງ, ຄຸນ​ສົມ​ບັດ​ສິນ​ທຳ​ປະ​ຕິ​ວັດ, ແບບ​ແຜນ​ວິ​ທີ​ເຮັດ​ວຽກ ທັງ​ເປັນ​ແບ​ຢ່າງ​ນຳ​ໜ້າ​ໃນ​ໜູ່​ມະ​ຫາ​ຊົນ ແລະ ປະ​ຊາ​ຊົນ​ບັນ​ດາ​ເຜົ່າ ພ້ອມ​ກັນ​ເຮັດ​ສຳ​ເລັດ​ທຸກ​ໜ້າ​ທີ່​ວຽກ​ງານ​ທີ່​ພັກ-ລັດ ຂັ້ນ​ເທິງມອບ​ໝາຍ​ໃຫ້ ແລະ ກ້າວ​ເຂົ້າ​ເປັນ​ສະ​ມາ​ຊິກ​ພັ​ກ​ທີ່​ດີ​ໃນ​ຕໍ່​ໜ້າ.

• < ຕໍ່ໄປ
• ຕໍ່ໄປ >