ປະເພນີຊາວພຸດ ໃນຫຼວງພະບາງ
ຫຼວງພະບາງ ເປັນເມືອງທີ່ສະຫງົບ ແລະ ງົດງາມມາແຕ່ອາດິດຈົນເຖິງປະຈຸບັນ, ເສິກສົງຄາມທີ່ເກີດຂື້ນໃນລາວຫຼາຍໆຄັ້ງໃນແຕ່ລະສະໄໝ ກໍ່ບໍ່ເຄີຍວ່າຈະສົ່ງຜົນກະທົບຕໍ່ຫຼວງພະບາງພໍປານໃດ, ການປ່ຽນແປງດ້ານການປົກຄອງໃນປີ ພສ 2018 ເບິ່ງໆແລ້ວ ບໍ່ໄດ້ເຮັດໃຫ້ວິຖີຊີວິດ ຂອງຊາວຫຼວງພະບາງປ່ຽນແປງໄປຈາກແຕ່ກ່ອນຫຼາຍປານໃດ, ໂດຍສະເພາະແມ່ນການດຳເນີນກິດຈະກຳທາງສາສະໜາ.
ຕະຫຼາດໃນຫຼວງພະບາງໃນທຸກມື້ນີ້ ກໍ່ຍັງມີຄວາມຄຶກຄັກກວ່າແຕ່ໃດໆມາ ເຊັ່ນ: ວັນເສົາ-ອາ ທິດ ແລະ ວັນສິນຂື້ນແປດຄໍ່າ ອາຫານການກິນກໍ່ຍັງຕ້ອງໄດ້ມີການຈັບຈ່າຍ-ຊື້ຂາຍກັນຫຼາຍຂື້ນເປັນພິເສດ.
ຕະຫຼາດເປັນສູນການຄ້າທາງດ້ານເສດຖະກິດຄືກັນກັບບັນດາວັດຕ່າງໆໃນຫຼວງພະບາງ ເພາະ ວ່າ ຊາວຫຼວງພະບາງ ໄດ້ເອົາວັນສິນເປັນວັດເລີກງາມຍາມດີ ພ້ອມຈິດ-ພ້ອມໃຈກັນມາຊຸມນຸມຢູ່ວັດ ເພື່ອຮ່ວມກັນເຮັດບຸນຊຳລະບາບປະຈຳປີ ຫຼືເອີ້ນກັນວ່າ ‘‘ສູດມົນ’’ ການສູດມົນເປັນງານບຸນ ເພື່ອໃຫ້ເກີດເປັນສີລິມຸງຄຸນແກ່ຈິດໃຈໃນການເຫຼີມໃສສັດທາ, ເພື່ອຄວາມຢູ່ດີກິນດີ, ປາສະຈາກໂລກໄພ ໄຂ້ເຈັບ ແລະ ສິ່ງທີ່ບໍ່ດີທັງໝົດທີ່ສ້າງໄວ້ນັ້ນໃຫ້ຫາຍຈາກໄປ, ຍັງເປັນຮີດຄອງປະເພນິ ຂອງຊາວຫຼວງພະບາງທີ່ສຶບທອດກັນມາແຕ່ຍາວນານ.
ພະສົງສູດມະຫາມຸງຄຸນ ສູດສະຍັນໂຕ ຕາມທຳນຽມ ຂອງການເຮັດບຸນຊຳລະບາບ, ຫຼັງຈາກນັ້ນ ກໍ່ມີການສັນເພນ ທີ່ຍາດໂຈມ ຫຼືເຈົ້າສັດທານຳມາຖະຫວາຍ, ພ້ອມນັ້ນ ຍັງມີດົນຕີລາວເດີມ ເສບຂັບກ່ອມ ໃນລະຫວ່າງສັນເພນ ຫຼືເອີ້ນກັນວ່າ ‘‘ເສບລາວເດີມ’’ ມີທັງຂັບທຸ້ມ, ອ່ານໜັງສື ແລະ ຂັບສະຫຼາມສາມສ້າວ ເຊິ່ງເປັນສິນລະປະດົນຕີຂັບລຳ ຂອງທ້ອງຖິ່ນ ທີ່ໄດ້ຮັບການອານຸລັກສຶບທອດກັນມາແຕ່ດຶກດຳບັນຈົນເຖິງທຸກມື້ນີ້.
ຂຽນໂດຍ: ທ. ບຸນທະວີ ສົມມະນີ, ໂຄສະນາແຂວງ