ພິທີປະດັບການຍ້ອງຍໍໃຫ້ບຸກຄົນ ແລະ ກົມກອງ ທີມີຜົນງານດີເດັ່ນໃນຂະບວນການແຂ່ງຂັນຮັກຊາດແລະ ພັດທະນາ 2016-2020 ທີ່ພະແນກກະສິກໍາ ແລະ ປ່າໄມ້ແຂວງ

ລາຍລະອຽດ

ສ້າງຂື້ນເມື່ອ ວັນຈັນ, 23 ມັງກອນ 2023 03:48

ຂຽນໂດຍ ອານຸພາບ ພັນໂດລັກ

ໃນຕອນເຊົ້າຂອງວັນທີ 20 ມັງກອນ 2023 ຢູ່ທີຫ້ອງປະຊຸມພະແນກກະສິກໍາ ແລະ ປ່າໄມ້ ແຂວງຫຼວງພະບາງ ໄດ້ຈັດພິທີປະດັບຫຼຽນ-ມອບໃບຍ້ອງຍໍໃຫ້ບຸກຄົນທີ່ມີຜົນງານດີເດັ່ນໃນຂະບວນການແຂ່ງຂັນຮັກຊາດ ສ້າງບ້ານພັດທະນາ, ການຜັນຂະຫຍາຍວຽກງານສາມສ້າງເຂົ້າສູ່ລວງເລິກໃນທົ່ວປະເທດ ໄລຍະ 5 ປີ (2016-2020) ແລະ ປະກາດເນື້ອໃນການແຂ່ງຂັນຮັກຊາດ ແລະ ພັດທະນາ 2020-2025 ຂຶ້ນ, ໂດຍໃຫ້ກຽດເປັນປະທານຂອງ ສະຫາຍ ນາງ ວຽນວິໄລ ດີລະພັນ, ກຳມະການປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງ, ມີສະຫາຍ ສີວອນ ວົງຄຳຈັນ, ກຳມະການພັກແຂວງ, ຫົວໜ້າພະແນກກະສິກຳແລະປ່າໄມ້ແຂວງ, ມີຫົວໜ້າພະແນກ, ຮອງພະແນກ ແລະ ແຂກຖືກເຊີນຈາກອ້ອມຂ້າງແຂວງຕະຫຼອດຮອດຫົວໜ້າຂະແໜງ, ພະນັກງານວິຊາການທີ່ໄດ້ຮັບຫຼຽນ ແລະ ໃບຍ້ອງຍໍເຂົ້າຮ່ວມ.

ໃນພິທີ ສະຫາຍ ສີວອນ ວົງຄຳຈັນ ກໍໄດ້ຂຶ້ນລາຍງານສະພາບການຈັດຕັ້ງປະຕິບັດວຽກງານ ຂໍ້ແຂ່ງຂັນຮັກຊາດ ແລະ ພັດທະນາ ໃນໄລຍະ 5 ປີ (2016-2020) ແລະ ປະກາດເນື້ອໃນການແຂ່ງຂັນຮັກຊາດ ແລະ ພັດທະນາ 2020-2025, ເຊິ່ງໄດ້ກ່າວເຖິງຜົນສຳເລັດໃນຫຼາຍດ້ານເປັນຕົ້ນ ວຽກງານສຶກສາອົບຮົມການເມືອງແນວຄິດໃຫ້ພະນັກງານລັດຖະກອນໃນຂົງເຂດຂອງຕົນ, ການຈັດຕັ້ງວຽກງານວິຊາສະເພາະຂອງຂະແໜງການກ່ຽວຂ້ອງ, ການສົ່ງເສີມການຜະລິດສະບຽງອາຫານ, ການປູກຝັງລ້ຽງສັດ ແລະ ອື່ນໆ ທີ່ຊ່ວຍໃຫ້ປະຊາຊົນບັນດາເຜົ່າພາຍໃນແຂວງຫຼວງພະບາງໄດ້ຫຼຸດຜ່ອນສະພາບການຂາດແຄນສະບຽງອາຫານ.

ໂດຍອີງຕາມລັດຖະດໍາລັດ ຂອງ ປະທານປະເທດ ສະບັບເລກທີ 154/ປປທ, ລົງວັນທີ 14 ກັນຍາ 2022 ແລະ ດໍາລັດ ຂອງ ນາຍົກລັດຖະມົນຕີ ສະບັບເລກທີ 363/ນຍ, ລົງວັນທີ 14 ກັນຍາ 2022. ສະຫາຍ ນາງ ວຽນວິໄລ ດີລະພັນ ຕາງໜ້າໃຫ້ຄະນະປະຈໍາພັກແຂວງ ໃຫ້ກຽດຂຶ້ນມອບຫຼຽນໄຊແຮງງານ ຊັ້ນ I ຈໍານວນ 4 ສະຫາຍ; ຫຼຽນໄຊແຮງງານ ຊັ້ນ II ຈຳນວນ 16 ສະຫາຍ; ຫຼຽນໄຊແຮງງານ ຊັ້ນ III ຈຳນວນ 22 ສະຫາຍ, ຍິງ 4 ສະຫາຍ; ຫຼຽນກາແຮງານ ຈໍານວນ 32 ສະຫາຍ, ຍິງ 5 ສະຫາຍ; ແລະ ຍ້ອງຍໍລັດຖະບານ ຈໍານວນ 64 ສະຫາຍ, ຍິງ 20 ສະຫາຍ ໃຫ້ແກ່ຜູ້ທີ່ມີຜົນງານດີເດັ່ນ ປະກອບສ່ວນດ້ານເຫື່ອແຮງ ແລະ ສະຕິປັນຍາ ເຂົ້າໃນຂະບວນການແຂ່ງຂັນຮັກຊາດ, ສ້າງບ້ານພັດທະນາ ແລະ ຂະຫຍາຍວຽກງານ 3 ສ້າງເຂົ້າສູ່ລ່ວງເລິກ ໄລຍະ 5 ປີ (2016-2020).

ທ້າຍພິທີ ສະຫາຍ ນາງ ວຽນວິໄລ ດີລະພັນ ໄດ້ມີຄໍາເຫັນຊີ້ນໍາເນັ້ນໜັກ ໃຫ້ບັນດາສະຫາຍສະມາຊິກພັກ ເອົາໃຈໃສ່ ເນື້ອໃນຮັກຊາດ ແລະ ພັດທະນາ, ສືບຕໍ່ເອົາໃຈໃສ່ວຽກການສຶກສາອົບຮົມການເມືອງແນວຄິດພະນັກງານລັດຖະກອນໃຫ້ເປັນປົກກະຕິ ແລະ ເລິກເຊິ່ງ, ເນັ້ນໜັກໃຫ້ບັນດາຂະ ແໜງການກວດກາຄືນແຜນການປະຕິບັດຂໍ້ແຂ່ງຂັນ 2020-2025 ກ່ຽວກັບຜົນສຳເລັດ ແລະ ຂໍ້ຄົງຄ້າງໃນໄລຍະຜ່ານມາໃຫ້ສຳເລັດຕາມເປົ້າໝາຍທີ່ວາງໄວ້. ນອກຈາກນີ້ ສະຫາຍ ຍັງໄດ້ເນັ້ນໜັກໃຫ້ສືບຕໍ່ປັບປຸງກົງຈັກການຈັດຕັ້ງໃຫ້ກະທັດຮັດແທດເໝາະກັບສະພາບການຈັດຕັ້ງປະຕິບັດວຽກງານຂອງບັນດາຂະແໜງການກ່ຽວຂ້ອງເພື່ອສູ້ຊົນພັດທະນາຂະແໜງການຂອງຕົນໃຫ້ເຂັ້ມແຂງ ເນັ້ນໜັກຄັດເລືອກບຸກຄົນດີເດັ່ນພາຍໃນ 5 ປີ ຕໍ່ໜ້າຢ່າງມີຄຸນນະພາບເພື່ອໃຫ້ບັນດາສະມາຊິກພັກໄດ້ຝຶກຝົນຫຼໍ່ຫຼອມຕົນເອງຢ່າງບໍຢຸດຢັ້ງ.

ບັນນາທິການຂ່າວ ຄອຂ ກວດແກ້: ບຸນທະວີ ສົມມະນີ  ຂຽນໂດຍ: ອານຸພາບ ພັນໂດລັກ

• < ຕໍ່ໄປ
• ຕໍ່ໄປ >