ເມືອງນ້ຳບາກ ປາຖະກະຖາວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 71 ປີ
ແລະ ວັນນັກຮົບເສຍອົງຄະ ແລະ ວັນນັກຮົບເສຍຫຼະຊີວິດ ເພື່ອປະເທດຊາດ ຄົບຮອບ 80 ປີ
ວັນທີ 24 ມີນາ 2026 ນີ້ ເມືອງນ້ຳບາກ ແຂວງຫຼວງພະບາງ ໄດ້ຈັດພິທີປາຖະກະຖາ ວັນສ້າງຕັ້ງພັກປະ ຊາຊົນ ປະຕິວັດລາວ ຄົບຮອບ 71 ປີ ( 22 ມີນາ ປີ1955 ຫາ 22 ມີນາ 2026 ), ແລະ ວັນນັກຮົບເສຍອົງຄະ ແລະ ເສຍສະຫຼະຊີວິດ ເພື່ອປະເທດຊາດ ຄົບຮອບ 80 ປີ ( 21 ມີນາ 1946 ຫາ 21 ມີນາ 2026), ຂື້ນຢູ່ທີ່ສະໂມ ສອນຂອງເມືອງ, ໂດຍໃຫ້ກຽດເຂົ້າຮ່ວມເປັນປະທານ ພ້ອມທັງປາຖະກະຖາຂອງ ສະຫາຍ, ຄຳສະໝອນ ເພັດດາ ລາ ຮອງເລຂາພັກເມືອງ, ຫົວໜ້າຄະນະຈັດຕັ້ງເມືອງ ມີບັນດາສະຫາຍ ຄະນະປະຈໍາພັກ, ກຳມະການພັກ, ຫົວໜ້າ-ຮອງຫົວໜ້າຫ້ອງການ, ພະນັກງານອາວຸໂສບຳນານ, ສອງກອງບັນຊາການ ທະຫານ-ຕຳຫຼວດ, ຕະຫຼອດຮອດພະ ນັກງານລັດຖະກອນເຂົ້າຮ່ວມຮັບຟັງ.
ໃນພິທີສະຫາຍ ໄດ້ຍົກໃຫ້ເຫັນປະຫວັດການກໍາເນີດ ແລະ ເຕີບໃຫຍ່ຂະຫຍາຍຕົວຂອງພັກປະຊາຊົນ ປະ ຕິວັດລາວວ່າ: ພັກປະຊາຊົນປະຕິວັດລາວ ໄດ້ຮັບການສ້າງຕັ້ງຂຶ້ນໃນວັນທີ 22 ມີນາ 1955 ໂດຍການສືບທອດພາ ລະກິດຈາກພັກຄອມມູນິດອິນດູຈີນ ເຊິ່ງແມ່ນປະທານ ໄກສອນ ພົມວິຫານ ເປັນຫຼັກແຫຼ່ງ ໃນການນໍາພາກໍ່ຕັ້ງ, ພັກໄດ້ຖືເອົາລັດທິມາກ-ເລນິນ ສົມທົບໃສ່ພາກປະຕິບັດຕົວຈິງຂອງການປະຕິວັດລາວເປັນພື້ນຖານແຫ່ງຄວາມຄິດແລະເປັນເຂັ້ມຊີ້ທິດເຍືອງທາງໃຫ້ແກ່ການນຳພາຂອງພັກ. ພາຍຫຼັງໄດ້ຮັບການສ້າງຕັ້ງຂຶ້ນພັກໄດ້ນໍາພາກອງທັບ ແລະ ປະຊາຊົນລາວບັນດາເຜົ່າຕໍ່ສູ້ ເພື່ອພາລະກິດປົດປ່ອຍຊາດຕ້ານຈັກກະພັດລ່າເມືອງຂຶ້ນແບບເກົ່າ ແລະ ໃໝ່ຢ່າງພິລະອາດຫານ ຈົນສາມາດນໍາພາກອງທັບ ແລະ ປະຊາຊົນລາວສໍາເລັດການປະຕິວັດຊາດ ປະຊາທິປະໄຕ ແລະ ສະຖາ ປະນາ ສປປ ລາວ ຂຶ້ນໃນວັນທີ 2 ທັນວາ 1975 ຢ່າງສະຫງ່າຜ່າເຜີຍ ນັບຕັ້ງແຕ່ນັ້ນມາ, ປະຊາຊົນລາວໄດ້ກາຍມາເປັນເຈົ້າຂອງປະເທດຊາດທີ່ມີເອກະລາດ, ອະທິປະໄຕ ແລະ ຜືນແຜນດິນອັນຄົບຖ້ວນ. ປະເທດຊາດໄດ້ກ້າວເຂົ້າສູ່ຍຸກໃໝ່ຂອງການພັດທະນາທີ່ຈະເລີນຮຸ່ງເຮືອງ; ເສດຖະກິດສືບຕໍ່ເຕີບໂຕ, ຊີວິດຂອງປະຊາຊົນໄດ້ຮັບການປັບປຸງຢ່າງດີຂຶ້ນ, ການຮ່ວມມືກັບປະຊາຄົມໂລກໄດ້ຂະຫຍາຍອອກໄປ, ແລະ ບົດບາດ ແລະ ອິດທິພົນຂອງພັກ ແລະ ປະ ເທດຊາດໄດ້ຮັບການຢືນຢັ້ນ ແລະ ໄດ້ຮັບການຍົກຍ້ອງຢ່າງສູງໃນເວທີພາກພື້ນ ແລະ ສາກົນ.
ພ້ອມນັ້ນໄດ້ໃຫ້ກຽດປາຖະກະຖາ ວັນນັກຮົບເສຍອົງຄະ ແລະ ເສຍສະຫຼະຊີວິດ ເພື່ອປະເທດຊາດ ຄົບອຮອບ 80 ປີ ໂດຍຍົກໃຫ້ເຫັນປະຫວັດຄວາມເປັນມາການກຳເນີດບັ້ນຮົບປ້ອງກັນຕົວເມືອງທ່າແຂກ; ສະພາບ ແລະ ການກະກຽມການຕໍ່ສູ້ຕ້ານພວກລ່າເມືອງຂຶ້ນແບບເກົ່າຂອງໜ່ວຍພັກເມືອງທ່າແຂກ; ເຫດການ ແລະ ການຕໍ່ ສູ້ຢ່າງພິລະອາດຫານຂອງທະຫານ ແລະ ປະຊາຊົນຢູ່ເມືອງທ່າແຂກ ຍ້ອນການກະທໍາທີ່ໄຮ້ມະນຸດສະທໍາ ແລະ ໂຫດຮ້າຍປ່າເຖື່ອນຂອງພວກລ່າເມືອງຂຶ້ນແບບເກົ່າຜູ້ຮຸກຮານ ວັນທີ 21 ມີນາ ຈຶ່ງກາຍເປັນວັນຄຽດແຄ້ນຂອງປະ ຊາຊົນລາວ. ການຈັດຕັ້ງປາຖະກະຖາຄັ້ງນີ້ກໍເພື່ອເຮັດໃຫ້ຄະນະພັກ-ຄະນະນຳ, ພະນັກງານ, ສະມາຊິກພັກ, ນາຍ ແລະ ພົນທະຫານ, ນາຍ ແລະ ພົນຕຳຫຼວດ ມີຄວາມຮັບຮູ້ເຊື່ອມຊຶມ ແລະ ເຂົ້າໃຈຢ່າງເລິກເຊິ່ງຕໍ່ກັບວັນສຳຄັນດັ່ງ ກ່າວ ມີຄວາມຈົ່ງຮັກພັກດີຕໍ່ພັກ, ຕໍ່ລັດ, ຕໍ່ປະເທດຊາດ, ເສີມຂະຫຍາຍທາດແທ້ມູນເຊື້ອປະຕິວັດ ແລະ ຕັ້ງໜ້າເຝິກຝົນຫຼໍ່ຫຼອມຕົນເອງ ໃຫ້ມີຄຸນທາດການເມືອງທີ່ໜັກແໜ້ນ, ມີຄຸນສົມບັດສິນທຳ, ສືບຕໍ່ປົກປັກຮັກສາ ແລະ ສ້າງສາພັດທະນາປະເທດຊາດ ແລະ ພ້ອມກັນນໍາເອົາມູນເຊື້ອອັນດີງາມຂອງພັກປະຊາຊົນປະຕິວັດລາວນໍາໄປຈັດຕັ້ງຜັນຂະຫຍາຍເຂົ້າໃນແຕ່ລະຂົງເຂດວຽກງານໃຫ້ມີຜົນສໍາເລັດສູງສຸດ.
ຂ່າວ: ຄະນະໂຄສະນາອົບຮົມເມືອງນໍ້າບາກ
ກວດແກ້: ຄະນະໂຄສະນາອົບຮົມແຂວງ