ຂົງເຂດວັດທະນະທຳ-ສັງຄົມຂັ້ນແຂວງ ຫວນຄືນມູນເຊື້ອ
ວັນສ້າງຕັ້ງພັກ ປປ ລາວ ຄົບຮອບ 70 ປີ
ຢູ່ທີຫ້ອງປະຊຸມ ຂອງກອງບັນຊາການທະຫານແຂວງ ຫຼວງພະບາງ ຈັດພິທີປາຖະກະຖາ ຫວນຄືນມູນເຊື້ອວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ ໃນວັນທີ 20 ມີນາ 2025 ໃຫ້ພະນັກງານຫລັກແຫລ່ງ ຂົງເຂດວັດທະນະທຳ-ສັງຄົມ, ໂຮງໝໍບໍລິເວນ 107, ໂຮງໝໍແຂວງ ແລະ ສະຖາບັນການສຶກສາ ເພື່ອສຶກສາອົບຮົມ, ປຸກລະດົມ ແລະ ເສີມຂະຫຍາຍມູນເຊື້ອນໍ້າໃຈຮັກຊາດ, ຮັກບ້ານເກີດເມືອງນອນ ຂອງສະມາຊິກພັກ, ພະນັກງານ, ເພື່ອພ້ອມກັນຕັ້ງໜ້າປະກອບສ່ວນ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນໍາພາອັນສະຫລາດສ່ອງໃສ ຂອງພັກປະຊາຊົນ ປະຕິວັດລາວ ພ້ອມກັນລະນຶກເຖິງຄຸນງາມຄວາມດີ ແລະ ນໍ້າໃຈເສຍສະຫລະອັນສູງສົ່ງ ຂອງບັນດານັກຮົບ ທີ່ໄດ້ອຸທິດຕົນ ເພື່ອປະເທດຊາດ ໃນຂະບວນການຕໍ່ສູ້ປົດປ່ອຍຊາດ ໃຫ້ເລິກເຊິ່ງ.
ການປາຖະກະຖາຄັ້ງນີ້ ໂດຍສະຫາຍ ບຸນເລື່ອມ ມະນີວົງ ກຳມະການປະຈຳພັກແຂວງ ຮອງເຈົ້າແຂວງໆຫລວງພະບາງ, ເຊິ່ງໄດ້ຍົກໃຫ້ເຫັນມູນເຊື້ອການກໍາເນີດ, ທາດແທ້ ແລະ ອຸດົມການຂອງພັກປະຊາຊົນ ປະຕິວັດລາວ ກໍຄືຜົນງານການນຳພາຂອງພັກ ຕະຫລອດໄລຍະ 70 ປີຜ່ານມາ ພ້ອມທັງຍົກໃຫ້ເຫັນມູນເຊື້ອຮັກຊາດ, ນໍ້າໃຈຕໍ່ສູ້ອັນພິລະອາດຫານບໍ່ຍອມຈຳນົນ ຂອງປະຊາຊົນບັນດາເຜົ່າທຸກຊັ້ນຄົນ ເຂົ້າໃນການຕໍ່ສູ້ກູ້ຊາດ ຕ້ານການຮຸກຮານຂອງພວກຈັກກະພັດລ່າເມືອງຂຶ້ນແບບເກົ່າ ແລະ ໃໝ່, ພາຍໃຕ້ການນຳພາ-ຊີ້ນໍາ ອັນສະຫລາດສ່ອງໃສ ຂອງພັກປະຊາຊົນປະຕິ ວັດລາວ ຈົນສາມາດຍາດໄດ້ເອກະລາດ, ອິດສະຫລະພາບ, ອະທິປະໄຕ ແລະ ຜືນແຜ່ນດິນອັນຄົບຖ້ວນ ມາສູ່ປວງຊົນລາວທັງຊາດ ແລະສະຖາປະນາເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975. ພັກປະຊາຊົນ ປະຕິວັດລາວ ສ້າງຕັ້ງຂຶ້ນໃນວັນທີ 22 ມີນາ 1955 ໂດຍການສືບທອດພາ ລະກິດ ຂອງພັກກອມມູນິດອິນດູຈີນ, ເຊິ່ງແມ່ນ ປະທານ ໄກສອນ ພົມວິຫານ ເປັນຫລັກແຫລ່ງນຳພາກໍ່ຕັ້ງ, ຖະນຸບຳລຸງ, ຝຶກຝົນຫລໍ່ຫລອມ, ກໍ່ສ້າງ ແລະ ປັບປຸງໃຫ້ໜັກແໜ້ນ ເຂັ້ມແຂງ ຢ່າງບໍ່ຢຸດຢັ້ງ, ປະກອບດ້ວຍບຸກຄົນທີ່ຕື່ນຕົວ, ຫ້າວຫັນປະຕິວັດດີ ເດັ່ນກວ່າໝູ່ ໄດ້ຮັບຄວາມໄວ້ວາງໃຈສູງກວ່າໝູ່ ໃນຊົນຊັ້ນກຳມະກອນ, ກະສິກອນ, ຊັ້ນຄົນປັນຍາຊົນ ແລະ ຊາວຜູ້ອອກແຮງງານອື່ນໆ ເຊິ່ງໄດ້ຜ່ານການທົດສອບ ໃນຂະບວນການປົກປັກຮັກສາ ແລະ ພັດທະນາປະ ເທດຊາດ, ມີຄວາມສະໝັກໃຈເຂົ້າໃນອົງການຈັດຕັ້ງຂອງພັກ ເພື່ອສູ້ຊົນປະຕິບັດວັດຖຸປະສົງ ແລະ ອຸດົມການຂອງພັກຢ່າງສຸດກົກສຸດປາຍ.
ສະຫາຍ ບຸນເລື່ອມ ມະນີວົງ ກ່າວຕື່ມວ່າ: ໃນເງື່ອນໄຂທີ່ພັກເປັນພັກກຳອຳນາດ ທີ່ຕັ້ງ ແລະ ພາລະບົດບາດຂອງພັກ ໄດ້ມີການປ່ຽນແປງຄື: ປະຊາຊົນຊາວຜູ້ອອກແຮງງານລາວບັນດາເຜົ່າ ໄດ້ກາຍເປັນເຈົ້າຂອງປະເທດຊາດ ທີ່ມີເອກະລາດ ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຕົນ ປະເທດຊາດ ໄດ້ກ້າວເຂົ້າສູ່ໄລຍະໃໝ່ແຫ່ງການສ້າງສາພັດທະນາ ເພື່ອຄວາມຈະເລີນຮຸ່ງເຮືອງ ຄວາມສົມບູນພູນສຸກຂອງປະຊາຊົນລາວຢ່າງແທ້ຈິງ.
ຂ່າວ: ທ. ທບຸນທະວີ ສົມມະນີ ຄະນະໂຄສະນາອົບຮົມແຂວງ.