ຈັດຊຸດອົບຮົມໃຫ້ມະຫາຊົນຜູ້ກ້າວໜ້າ
ເພື່ອຂະຫຍາຍເຂົ້າເປັນສະມາຊິກພັກ ຊຸດທີ V ປະຈໍາປີ 2025
ໃນວັນທີ 4-5 ກັນຍາ 2025 ນີ້ ຢູ່ທີ່ຫ້ອງປະຊຸມຂອງຄະນະໂຄສະນາອົບຮົມແຂວງໄດ້ມີການຈັດຕັ້ງອົບຮົມໃຫ້ມະຫາຊົນຜູ້ກ້າວໜ້າເພື່ອຂະຫຍາຍເຂົ້າເປັນສະມາຊິກພັກ ຊຸດທີ່ V ໂດຍການເປັນ ປະທານ ຂອງ ສະຫາຍ ສົມຈິດ ສິງລໍຄໍາ ຮອງເລຂາໜ່ວຍພັກ ຮອງຫົວໜ້າຄະນະໂຄສະນາອົບຮົມແຂວງ. ມີຄະນະຮັບຜິດຊອບ ແລະ ນັກສຳມະນາກອນມາຈາກຄະນະພັກຮາກຖານວິທະຍາໄລກະສິກໍາ ແລະ ປ່າໄມ້ພາກເໜືອ, ໜ່ວຍພັກຄະນະກວດກາພັກ-ລັດແຂວງຫຼວງພະບາງ, ຄະນະພັກຮາກຖານສະຖາບັນຍຸຕິທໍາແຫ່ງຊາດສາຂາ ແຂວງຫຼວງພະບາງ, ຄະນະພັກຮາກຖານພະແນກສາທາລະນະສຸກແຂວງ, ໜ່ວຍພັກໂຮງຮຽນການເມືອງ ແລະ ການປົກຄອງແຂວງ, ໜ່ວຍພັກພະແນກຍຸຕິທໍາແຂວງ, ຄະນະພັກຮາກຖານພະແນກໂຍທາທິການ ແລະ ຂົນສົ່ງແຂວງ ຈໍານວນ 25 ສະຫາຍ, ຍິງ 05 ສະຫາຍ.
ໃນພິທີ ປະທານໄດ້ມີຄຳເຫັນຊີ້ນຳບັ້ນຝຶກອົບຮົມ ເຊິ່ງໄດ້ເນັ້ນໜັກໃຫ້ມະຫາຊົນຜູ້ກ້າວໜ້າໄດ້ຮັບຮູ້ ແລະ ເຂົ້າໃຈ ເບື້ອງຕົ້ນກ່ຽວກັບປະຫວັດ, ຄວາມເປັນມາ, ອຸດົມການ ແລະ ທາດແທ້ ຂອງພັກປະຊາຊົນປະຕິວັດລາວ ເຂົ້າໃຈກ່ຽວກັບມາດຖານ ແລະ ເງື່ອນໄຂຜູ້ທີ່ຈະຂະຫຍາຍເຂົ້າເປັນສະມາຊິກພັກປະຊາຊົນປະຕິວັດລາວ ບົນພື້ນຖານຄວາມເຂົ້າໃຈດັ່ງກ່າວ ຕ້ອງຕັ້ງໜ້າຝືກຝົນຫຼໍ່ຫຼອມຕົນເອງ ໃຫ້ໄດ້ມາດຖານ, ເງື່ອນໄຂຄົບຖ້ວນ ແລະ ມີຄວາມຕື່ນຕົວສະໝັກໃຈເຂົ້າເປັນສະມາຊິກພັກ ປະຊາຊົນປະຕິວັດລາວ ເພື່ອເພີ່ມກໍາລັງແຮງສູ້ຮົບໃຫ້ແກ່ພັກນັບມື້ນັບຫຼາຍຂື້ນ ໂດຍສະເພາະແມ່ນມະຫາຊົນຜູ້ກ້າວໜ້າ ຕ້ອງຮັບຮູ້-ເຂົ້າໃຈຢ່າງເລີກເຊີ່ງ ແລະ ມີສະຕິລະວັງຕົວຢູ່ສະເໜີ, ກໍາແໜ້ນທິດນໍາໃນການກໍ່ສ້າງພັກໃຫ້ປອດໃສເຂັ້ມແຂງ ແລະ ໜັກແໜ້ນ ເພື່ອເຮັດໃຫ້ການຈັດຕັ້ງຂອງພັກ ມີຄວາມໜັກແໜ້ນ ເພື່ອສືບຕໍ່ເຮັດວຽກໜ້າທີ່ການເມືອງຂອງພັກທີ່ມອບໝາຍໄດ້ມີຜົນສຳເລັດສູງ ຮັບຮູ້ກ່ຽວກັບເນື້ອໃນເອກະສານ ອົບຮົມເປົ້າໝາຍຂະຫຍາຍເຂົ້າພັກ 13 ຄໍາຖາມ 13 ຄໍາຕອບ ແລະ 11 ຂໍ້ຫ້າມສຳລັບສະມາຊິກພັກປະຊາຊົນປະຕິວັດລາວ ການອົບຮົມແມ່ນໄດ້ນຳໃຊ້ວິທະຍາກອນມາຈາກ ຄະນະໂຄສະນາອົບຮົມແຂວງ 3 ສະຫາຍ ແລະ ໄດ້ດຳເນີນເປັນເວລາ 2 ວັນ.
ຕອນທ້າຍພິທີ ປະທານ ຍັງໄດ້ມອບມະຕິຕົກລົງຂອງຄະນະປະຈໍາພັກແຂວງ ແລະ ໜັງສືນໍາສົ່ງຂອງຄະນະໂຄສະນາອົບຮົມແຂວງ ໃຫ້ນັກສໍາມະນາກອນແຕ່ລະສະຫາຍ ໄວ້ເປັນຫຼັກຖານ
ໂດຍ: ສຸດທະວີໄຫວ ມີທະວົງ