ພິທີຕ້ອນຮັບ
ໃນລະຫວ່າງວັນທີ່ 25-26 ມີນາ 2024 ນີ້ ທີ່ຫ້ອງປະຊຸມຄະນະພັກແຂວງຫຼວງພະບາງ ໄດ້ຈັດພິທີຕ້ອນຮັບ ທ່ານ ປອ ຄຳພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ ພ້ອມດ້ວຍທີມງານ, ໂດຍແມ່ນທ່ານ ສຸກັນ ບຸນຍົງ ຮອງເລຂາພັກແຂວງຫຼວງພະບາງ, ທ່ານ ນາງ ວຽນວິໄລ ດີລະພັນ ກຳມະການປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງ ພ້ອມດ້ວຍພະແນກການທີ່ກ່ຽວຂ້ອງ ແລະ 2 ເມືອງ 1 ນະຄອນ ເຂົ້າຮ່ວມ.
ໃນພິທີ ທ່ານ ນາງ ວຽນວິໄລ ດີລະພັນ ກຳມະການປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງ ໄດ້ໃຫ້ກຽດຜ່ານບົດລາຍງານການຈັດຕັ້ງວຽກງານໂຄສະນາຮອບດ້ານທີ່ພົ້ນເດັ່ນ ເປັນຕົ້ນແມ່ນ ການສ້າງແຜນກຳນົດຕຳ ແໜ່ງງານຂອງຄະນະໂຄສະນາອົບຮົມຂັ້ນແຂວງ, ເມືອງ-ນະຄອນ, ການໂຄສະນາເຜີຍແຜ່ບັນດານິຕິກຳຕ່າງໆ ຂອງສູນກາງວາງອອກ ແລະ ພິທີປາຖະກະຖາເລົ່າມູນເຊື້ອວັນສຳຄັນຂອງຊາດ-ຂອງພັກ ແລະ ວັນສຳຄັນຂອງທ່ານຜູ້ນຳທົ່ວທຸກເປົ້າໝາຍໃນຂອບເຂດທົ່ວແຂວງ, ການຂຽນຂ່າວ-ສ້າງສະກຣິບຂ່າວອອກລາຍການວິທະຍຸກະຈາຍສຽງແຂວງຫຼວງພະບາງ ໃນລາຍການ (ຮູ້ແນວທາງ ປະຕິບັດໃຫ້ເປັນຈິງ), ໂດຍປະຕິບັດຕາມນິຕິກໍາຂອງສູນກາງໂດຍສະເພາະແມ່ນການດຳເນີນກອງປະຊຸມໃຫຍ່ 3 ຂັ້ນຂອງພັກ, ມາຮອດປະຈຸບັນທົ່ວແຂວງຈັດຕັ້ງປະຕິບັດແລ້ວຢູ່ຂັ້ນຮາກຖານບ້ານທັງໝົດ 85.01%, ຄາດວ່າຈະໃຫ້ສໍາເລັດໃນທ້າຍເດືອນ ເມສາ 2024 ນີ້, ຈາກນັ້ນຈິງຈະສຶບຕໍ່ຈັດຕັ້ງປະຕິບັດຢູ່ບັນດາໜ່ວຍພັກສໍານັກງານ-ອົງການ ຕາມການກຳນົດຂອງຄະນະປະຈຳພັກແຂວງວາງໄວ້.
ຕອນທ້າຍພິທີໄດ້ໃຫ້ກຽດຮັບຟັງການໂອ້ລົມ ຂອງທ່ານ ປອ ຄຳພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ, ທ່ານໄດ້ເໜັ້ນໃຫ້ຄະນະພັກ-ຄະນະນຳຂັ້ນທ້ອງຖິ່ນໂດຍສະເພາະແຂວງຫຼວງພະບາງ ໃຫ້ສືບຕໍ່ຮັກສາມູນເຊື້ອດຸໝັ່ນ, ຄວາມສາມັກຄີຮັກແພງ, ຮີດຄອງປະ ເພນີອັນດີງາມ, ເປັນເຈົ້າພາບທີ່ດີໃນການຕ້ອນຮັບແຂກບ້ານແຂກເມືອງ ແລະ ການບໍລິການຕ່າງໆ ໃຫ້ດີຂື້ນເລື້ອຍໆ ສິ່ງສຳຄັນຕ້ອງສືບຕໍ່ສຶກສາອົບຮົມການເມືອງ-ແນວຄິດໃຫ້ພະນັກງານຫຼັກແຫຼ່ງ-ສະມາຊິກພັກ, ຕະຫຼອດຮອດຊາວໜຸ່ມ, ແມ່ຍິງ ແລະ ປະຊາຊົນບັນດາເຜົ່າໃຫ້ເຂົ້າໃຈຕໍ່ແນວທາງປ່ຽນແປງໃໝ່ຂອງພັກໃຫ້ເລິກເຊິ່ງ ໂດຍສະເພາະການໄປອອກແຮງງານຢູ່ຕ່າງແດນ ໃຫ້ປະຕິບັດຕາມລະບຽບບ້ານເມືອງ, ສິ່ງສຳຄັນອີກເທື່ອໜຶ່ງແມ່ນການບໍລິໂພກຂໍ້ມູນຂ່າວສານທາງອອນໄລສ ໃຫ້ມີສະຕິ ແລະ ໄຕ່ຕອງໃຫ້ດີ.
ຂຽນໂດຍ: ທ. ບຸນທະວີ ສົມມະນີ
