ພິທີປາຖະກະຖາວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ
ຂົງເຂດບໍລິສັດ-ລັດວິສາຫະກິດ ແລະ ທະນາຄານ ສາຂາແຂວງຫຼວງພະບາງ ໄດ້ຈັດພິທີໂຄສະ ນາ-ປາຖະກະຖາຂຶ້ນໃນຕອນບ່າຍ ຂອງວັນທີ 21 ມີນາ 2025 ນີ້, ທີ່ຫ້ອງປະຊຸມ ທະນາຄານແຫ່ງ ສປປ ລາວ ພາກເໜືອ ແຂວງຫຼວງພະບາງ, ໂດຍໃຫ້ກຽດປາຖະກະຖາ ຂອງທ່ານ ປອ ບຸນເຫຼືອ ສິນໄຊວໍຣະວົງ, ຮອງເລຂາພັກແຂວງ, ຮອງເຈົ້າແຂວງຫຼວງພະບາງ, ມີຄະນະຮາກຖານພັກ ທີ່ມາຈາກ ບໍລິ ສັດ-ລັດວິສາຫະກິດ ແລະ ທະນາຄານ ສາຂາແຂວງຫຼວງພະບາງ ເຂົ້າຮ່ວມຮັບຟັງ ທັງໝົດ 14 ພາກ ສ່ວນ.
ປະທານພິທີ ໄດ້ຫວນຄືນມູນເຊື້ອ ການກຳເນີດ ແລະເຕີບໃຫຍ່ຂະຫຍາຍຕົວ, ຜົນງານ ແລະໄຊ ຊະນະ 70 ປີ ພາຍໃຕ້ການຊີ້ນຳ-ນຳພາ ຂອງພັກປະຊາຊົນປະຕິວັດລາວ ແລະການເສີມຂະຫຍາຍມູນ ເຊື້ອ, ທາດແທ້ຂອງພັກປະຊາຊົນປະຕິວັດລາວ, ຍົກໃຫ້ເຫັນມູນເຊື້ອຮັກຊາດ, ນໍ້າໃຈຕໍ່ສູ້ອັນພິລະອາດຫານບໍ່ຍອມຈຳນົນ ຂອງປະຊາຊົນບັນດາເຜົ່າ, ທຸກຊັ້ນຄົນເຂົ້າໃນການຕໍ່ສູ້ກູ້ຊາດ ຕ້ານການຮຸກຮານຂອງພວກຈັກກະພັດລ່າເມືອງຂື້ນແບບເກົ່າ ແລະໃໝ່, ພາຍໃຕ້ນຳພາ-ຊີ້ນໍາ ອັນສະຫຼາດສ່ອງໃສ ຂອງພັກປະຊາຊົນປະຕິວັດລາວ ຈົນສາມາດຍາດໄດ້ເອກະລາດ, ອິດສະຫຼະພາບ, ອະທິປະໄຕ ແລະຜືນແຜ່ນດີນອັນຄົບຖ້ວນ ມາສູ່ປວງຊົນລາວທັງຊາດ, ພັກປະຊາຊົນປະຕິວັດລາວ ສ້າງຕັ້ງຂຶ້ນໃນວັນທີ 22 ມີນາ 1955 ໂດຍການສືບທອດພາລະກິດຂອງພັກກອມມຸນິດອິນດູຈີນ, ເຊິ່ງແມ່ນ: ປະທານ ໄກສອນ ພົມວິຫານ ເປັນຫຼັກແຫຼ່ງນຳພາກໍ່ຕັ້ງ, ທະນຸບຳລຸງ, ຝຶກຝົນຫຼໍ່ຫຼອມ, ກໍ່ສ້າງ ແລະປັບປຸງໃຫ້ໜັກແໜ້ນ, ເຂັ້ມແຂງຢ່າງບໍ່ຢຸດຢັ້ງ ແລະສະຖາປະນາເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ຂື້ນຢ່າງສະຫງ່າຜ່າເຜີຍ ໃນວັນທີ 2 ທັນວາ ປີ 1975.
ການປາຖະກະຖາຄັ້ງນີ້ ເພື່ອເປັນການໂຄສະນາສຶກສາອົບຮົມໃຫ້ສະມາຊິກພັກ, ພະນັກງານ-ລັດຖະ ກອນ ໄດ້ຮັບຮູ້-ເຂົ້າໃຈທາດແທ້ມູນເຊື້ອອັນດີງາມຂອງພັກ ແນໃສ່ສັນລະເສີນຄຸນງາມຄວາມດີຂອງບັນ ດາ ບັນພະບູລຸດຜູ້ທີ່ເສຍສະຫຼະຊີວິດ ເພື່ອຊາດເພື່ອປະຊາຊົນ ແລະ ເພື່ອປຸກລະດົມນໍ້າໃຈຮັກຊາດຮັກລະບອບໃໝ່, ຍົກສູງການສ້າງເສດຖະກິດເອກະລາດ ເປັນເຈົ້າຕົນເອງຕາມທິດເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງເທື່ອລະກ້າວ.
ຂ່າວໂດຍ: ທ. ບຸນທະວີ ສົມມະນີ, ຄະນະໂຄສະນາອົບຮົມແຂວງ.