ພິທີຊຸດອົບຮົມສະມາຊິກພັກໃໝ່ ຊຸດທີ I
ໃນຕອນເຊົ້າຂອງວັນທີ 27 ມີນາ 2024 ຜ່ານມານີ້ ຢູ່ທີ່ຫ້ອງປະຊຸມຄະນະໂຄສະນາອົບຮົມແຂວງ ຫຼວງພະບາງ ໄດ້ມີການຈັດຕັ້ງອົບຮົມຄວາມຮູ້ພື້ນຖານແນວທາງຂອງພັກ ໃຫ້ສະມາຊິກພັກໃໝ່ ທີ່ມາຈາກຄະນະພັກຮາກຖານສະຖາບັນຍຸຕິທຳພາກເໜືອ, ໜ່ວຍພັກພະແນກຍຸຕິທຳແຂວງ ແລະ ຄະນະພັກຮາກຖານພະແນກການເງິນແຂວງ, ໂດຍການເປັນປະທານ ຂອງ ສະຫາຍ ນາງ ວຽນວິໄລ ດີລະພັນ, ກຳມະການປະຈຳພັກແຂວງ, ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງ, ມີຄະນະຮັບຜິດຊອບ ແລະ ນັກສຳມະນາກອນທີ່ເປັນສະມາຊິກພັກໃໝ່ ຈຳນວນ 25 ສະຫາຍ ຍິງ 10 ສະຫາຍ.
ໃນພິທີ ປະທານໄດ້ມີຄຳເຫັນຊີ້ນຳບັ້ນຝຶກອົບຮົມ ແລະ ໄດ້ເນັ້ນໜັກໃຫ້ບັນດາສະມາຊິກພັກໃໝ່ ເອົາໃຈໃສ່ກຳແໜ້ນເນື້ອໃນຈິດໃຈ ຄວາມໝາຍຄວາມສຳຄັນຂອງບັນດາເອກະສານ ເພື່ອນຳໄປໝູນໃຊ້ໃນການປະຕິບັດວຽກງານຕົວຈິງໃນສະເພາະໜ້າ, ໂດຍສະເພາະແມ່ນນໍາໃຊ້ເຂົ້າໃນກົມກອງຂອງຕົນໃຫ້ຖືກຕອ້ງ, ສອດຄ່ອງຕາມແນວທາງຂອງພັກ ພ້ອມທັງຝຶກຝົນຫຼໍ່ຫຼອມຕົນເອງໃນທຸກດ້ານ ໃຫ້ກາຍເປັນພະນັກງານ-ສະມາຊິກພັກທີມີຄວາມຮູ້ພື້ນຖານກ່ຽວກັບລັດທິມາກ-ເລນິນ ຮູ້ກໍ່ສ້າງ ແລະ ປັບປຸງປົວແປງພັກ, ມີຄຸນສົມບັດ-ສິນທຳປະຕິວັດ, ເຊີດຊູຄວາມເປັນແບບຢ່າງນຳໜ້າ, ພ້ອມກັນຄົ້ນຄວ້າຊອກຫາວິທີແກ້ໄຂພະຍາດອາດຍາສິດ, ສະກັດກັ້ນຕ້ານການສໍ້ລາດບັງຫຼວງ, ລວມທັງສິ່ງທ້າທາຍທົດສອບຕ່າງໆ, ສາມາດແບກຫາບໜ້າທີ່ການເມືອງຂອງພັກ ແລະ ກາຍເປັນຜູ້ສືບທອດຄົບຕາມມາດຖານເງື່ອນໄຂຂອງພັກວາງອອກ.
ການອົບຮົມໃນຄັ້ງນີ້ແມ່ນນຳໃຊ້ເອກະສານ 4 ບົດ ທີ່ຄະນະໂຄສະນາອົບຮົມສູນກາງພັກສົ່ງໃຫ້, ການອົບຮົມແມ່ນໄດ້ນຳໃຊ້ວິທະຍາກອນມາຈາກ 3 ພາກສ່ວນຄື: ຄະນະໂຄສະນາອົບຮົມແຂວງ, ຄະນະກວດກາພັກແຂວງ ແລະ ຄະນະຈັດຕັ້ງແຂວງ, ການອົບຮົມໃນຄັ້ງນີ້ແມ່ນໄດ້ດຳເນີນເປັນເວລາ 2 ວັນເຕັມ.
