ຫຼວງພະບາງຕິດໃນ 10 ປະເທດ ທີ່ເປັນໜ້າທ່ອງທ່ຽວ ໃນລະດັບໂລກ
ຈາກທີ 1 ໃນອາຊີ, ບັດນີ້ຫຼວງພະບາງຕິດລາຍຊື່ 10 ປະເທດເປົ້າໝາຍ ການເດີນທາງຂອງໂລກ, ສາຍເຫດຕົ້ນຕໍ:
- ແມ່ນສະຖານທີ່ທ່ອງທ່ຽວໃນຕົວເມືອງ (Luangprabang town). ເປັນເມືອງປະສົມປະສານເກົ່າແກ່ອີກເມືອງໜຶ່ງ ທີ່ມີກິ່ນອາຍອະລິຍະທຳ ແລະ ຮູບແບບສະຖາປັດຕິຍະກຳ ຫຼືວ່າ ການຕົບແຕ່ງຮູບແບບເຮືອນຊານ ບ້ານຊ່ອງ ແມ່ນເປັນຊົງຝຣັງ ແຕ່ຄາວຝຣັງປົກຄອງ, ນັ້ນແມ່ນອີກຈຸດໜຶ່ງ ທີ່ວາລະສານລະດັບໂລກຈັດໃຫ້.
- ປະເພດວັດວາອາຮາມ ປູສະນີຍະສະຖານເກົ່າແກ່ ມີການຈາລຶກຫຼາຍໆຢ່າງ ບັນດາທ່ານສາມາດສັງເກດໄດ້ຕາມຝາພະນັງຂອງໂບດ-ທາງສີມ, ຢູ່ຫຼວງພະບາງ ແມ່ນເປັນລວດລາຍ ເປັນເອກະລັກ ແຕ່ລະລວດລາຍ ລ້ວນແລ້ວແຕ່ມີທີ່ໄປ ທີ່ມາ ແລະ ມີຄວາມໝາຍຂອງແຕ່ລະລວດລາຍ ຂອງແຕ່ລະຍຸກ ແຕ່ລະສະໄໝ ທີ່ເພິ່ນໄດ້ກ່າວອ້າງມາ, ການອອກແບບດັ່ງກ່າວ ມີຄວາມໂດດເດັ່ນ, ກໍ່ບໍ່ຄືໃຜ ແລະ ບໍ່ຊໍ້າໃຜ.
- ກ່ຽວກັບຊີວິກການເປັນຢູ່ ຂອງພໍ່ແມ່ປະຊາຊົນລາວ ແລະ ວັດທະນະທຳ ເຊັ່ນວ່າ: ການໃສ່ບາດຍາດນໍ້າທຸກໆຕອນເຊົ້າ ຂອງຊາວຫຼວງພະບາງ ທີ່ກາຍເປັນມົນສະເໜ ຂອງຫຼວງພະບາງໄປແລ້ວດ້ວຍຜູ້ຄົນ, ນັກທ່ອງທ່ຽວທີ່ເດີນທາງເຂົ້າມາທ່ຽວຢູ່ຫຼວງພະບາງ ກໍ່ຕ້ອງໄດ້ມີການຕື່ນນອນແຕ່ເດິກ ລຸກແຕ່ເຊົ້າໆ ເພື່ອຈະໄປເອົາປະສົບການໃໝ່ ໃນການຕັກ ບາດ ແລະ ຖ່າຍຮູບໄວ້ເປັນທີ່ລະນຶກ ນັ້ນກໍ່ເປັນອີກມົນສະເໜໜຶ່ງ ຂອງຫຼວງພະບາງ.
- ອາຫານຂອງຫຼວງພະບາງ ຖືວ່າເປັນອາຫານທີ່ເປັນເອກະລັກ ລົດຊາດແຊບຊ້ອຍ ໂດຍສະເພາະແມ່ນເອາະ ຫຼາມ-ໄຄແພ່ນ ແລະ ອີ່ຫຍັງຕ່າງໆ, ນັ້ນກໍ່ເປັນຈຸດໜຶ່ງທີ່ວ່າ ສ້າງຄວາມດຶງດູດນັກທ່ອງທ່ຽວທີ່ເຂົ້າມາທ່ຽວ ແລະ ໄດ້ລອງຊີມກັນ.
- ແມ່ນຫັດຖະກຳຕໍ່າແພ່ນແພແບບພື້ນບ້ານ ແລະ ກໍ່ເປັນບ່ອນທີ່ນັກທ່ອງທ່ຽວໄດ້ເຂົ້າໄປສຶກສາຮໍ່າຮຽນຮູ້ ນີ້ກໍ່ເປັນອີກຈຸດໜຶ່ງທີ່ດຶງດູດນັກທ່ອງທ່ຽວເຂົ້າໄປສຳພັດຕົວຈິງຢູ່ຫຼວງພະບາງ.
- ກ່ຽວກັບສະຖານທີ່ທ່ອງທ່ຽວນໍ້າຕົກຕາດກວາງຊີ ກໍ່ເປັນນໍ້າຕົກທີ່ມີຄວາມສວຍສົດງົດງາມທີ່ສຸດອີກຈຸດໜຶ່ງ ຂອງປະເທດລາວ, ມີຫຼາຍຖ້ານ ຫຼາຍຊັ້ນ ເມື່ອເວລານໍ້າຍ້ອຍລົງມາ ເປັນນໍ້າແບບມໍລະກຸນ ຕົກລົງວັງແລ້ວຈະກາຍເປັນສີມໍລະກົດ ເບິ່ງແລ້ວປານສະຫວັນປັ້ນແຕ່ງຂື້ນມາ
- ນອກຈາກນັ້ນ, ຍັງມີພະທາດພູສີທີ່ສູງສະຫງ່າຕັ້ງຢູ່ໃຈກາງເມືອງ ເຮົາສາມາດຫຼຽວເຫັນທີວທັດທຳມະຊາດໃນມຸມ 360 ອົງສາ ໄດ້ທົ່ວຫຼວງພະບາງ ບວກກັບຫຼວງພະບາງ ມີແມ່ນໍ້າຂອງ ກັບສາຍນໍ້າຄານທີ່ມາບັນຈົບຄົບກັນ ນັ້ນກໍ່ເປັນອີກມົນສະເໜໜຶ່ງ ຂອງຫຼວງພະບາງ, ຂື້ນພູສີເບິ່ງຕາເວັນອອກໃນຍາມເຊົ້າໆ ແລະ ເບິ່ງຕາເວັນຕົກດິນໃນຍາມຄ້ອຍຄໍ່າລົງແລງ, ມີການລ່ອງເຮືອຕາມແມ່ນໍ້າຂອງ ເພື່ອເບິ່ງທຳມະຊາດທີ່ສວຍງາມສອງຝາກຝັ່ງແມ່ນໍ້າ ພ້ອມທັງໄປທ່ຽວຊົມຖໍ້າຕິ່ງ ແລະ ອີກຫຼາຍໆຢ່າງ ທີ່ເຮົາບໍ່ສາມາດກ່າວມາໝົດໄດ້, ເນື່ອງຈາກວ່າຍັງມີຫຼາຍໆສິ່ງ ຫຼາຍໆຢ່າງທີ່ພົ້ນເດັ່ນ.
ກ່ອນທີ່ຈະໄດ້ຮັບຫຼວງພະບາງເປັນເມືອງມໍລະດົກໂລກ ຈາກອົງການ ຢູເນັດສະໂກ ກໍ່ຍ້ອນມີສິ່ງຢັ້ງຢືນທີ່ພິສູດໃຫ້ເຫັນວ່າ ເມືອງຫຼວງພະບາງ ເປັນເມືອງທີ່ສົມຄວນ-ເໝາະສົມທີ່ຈັດໃຫ້ເປັນເມືອງມໍລະດົກໂລກ ເປັນເມືອງທຳອິດ ຂອງ ສປປລາວ, ໂດຍລວມແລ້ວ ຫຼວງພະບາງແມ່ນສົມບຸນແບບທຸກຢ່າງ ໃນການຂື້ນເປັນເມືອງມໍລະດົກໂລກ.
ສິ່ງທີ່ພວກເຮົາຕ້ອງຄວນເອົາໃຈໃສ່, ຢາກໃຫ້ມັນດີ ເປັນຊີວິດຈິດໃຈນັ້ນຄື: ເລື່ອງຄວາມຈົບງາມ, ຄວາມສະອາດງາມຕາຕາມທ້ອງຖະໜົ້ນຫົນທາງ, ການຖີ້ມຂີ້ເຫຍື້ອ ຕ້ອງໄປຖີ້ມຢູ່ບ່ອນທີ່ເພິ່ນກຳນົດໄວ້, ອາຫານການກິນໃຫ້ສະອາດຖືກລັກອະນາໄມ, ການບໍລິການບ້ານພັກ-ໂຮງແຮມ, ຮ້ານອາຫານ ແລະ ສະຖານທີ່ທ່ອງທ່ຽວຕ່າງໆ ກໍ່ຈະຕ້ອງໄດ້ປະຕິ ບັດຕາມ ທີ່ໜ່ວຍງານຮັບຜິດຊອບໄດ້ປະກາດແຈ້ງການຢ່າງເຂັ້ມງວດ, ຫ້າມເອົາລັດ ເອົາປຽບນັກທ່ອງທ່ຽວ, ຢ່າສ້າງພາບພົດທີ່ບໍ່ດີ ບໍ່ງາມ ຕໍ່ກັບນັກທ່ອງທ່ຽວ ຫຼື ສິ່ງແວດລ້ອມອ້ອມຂ້າງຕ່າງໆ, ເຖິງຜ່ານມາພວກເຮົາເຮັດໄດ້ດີແລ້ວ ແຕ່ກໍ່ຂໍຝາກເຖິງພໍ່ແມ່ພີ່ນ້ອງ ໂດຍສະເພາະແມ່ນຜູ້ເຮັດການບໍລິການຕ່າງໆ ຈົ່ງພ້ອມກັນປົກປັກຮັກສາພ້ອມກັນ ໃຫ້ຍືນຍົງຕະ ຫຼອດໄປ. (ຂໍ້ມູນຈາກວາລະສານລະດັບໂລກ).
ຂຽນໂດຍ: ທ. ບຸນທະວີ ສົມມະນີ, ຄະນະໂຄສະນາອົບຮົມແຂວງ ຫຼບ.