ຫຼວງພະບາງ ຈັດກິດຈະກຳຍ່າງເພື່ອສຸຂະພາບ
ຕ້ອນຮັບວັນສ້າງຕັ້ງພັກ ຄົບຮອບ 70 ປີ
ແຂວງຫຼວງພະບາງ ຈັດກິດຈະກຳຍ່າງເພື່ອສຸຂະພາບ ເພື່ອຂໍ່ານັບຊົມເຊີຍວັນສ້າງຕັ້ງພັກປະຊາ ຊົນປະຕິວັດລາວ ຄົບຮອບ 70 ປີ ໃນວັນທີ 21 ມີນາ 2025 ເລີ່ມແຕ່ຈຸດໜ້າຫ້ອງວ່າການແຂວງ ໂດຍມີ ທ່ານ ສຸກັນ ບຸນຍົງ ຮອງເລຂາພັກແຂວງຫຼວງພະບາງ ພ້ອມດ້ວຍການນໍາພັກ-ລັດ, ພະນັກງານຫຼັກ ແຫຼ່ງຂອງແຂວງ ແລະ ນັກຮຽນ-ນັກສຶກສາ ພາຍໃນແຂວງ ເຂົ້າຮ່ວມ.
ການສ້າງຂະບວນການຍ່າງຄັ້ງນີ້ ເພື່ອເປັນການສະເຫຼີມສະຫຼອງວັນປະຫວັດສາດສຳຄັນ ຂອງພັກ ໂດຍສະເພາະແມ່ນ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ ໃຫ້ເປັນຂະບວນຟົດຟື້ນ ທັງເປັນການເອກອ້າງຜົນງານ ການນຳພາ-ຊີ້ນຳ ຂອງພັກຕະຫຼອດໄລຍະ 70 ປີຜ່ານມາ ທີ່ໄດ້ອຸທິດຕົນເຂົ້າໃນພາລະກິດການປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືແຂວງຫຼວງພະບາງ ໃຫ້ໄດ້ຮັບນາມມະຍົດ ເມືອງຍອດນິຍົມການທ່ອງທ່ຽວຂອງສາກົນ ແລະ ຮັກສາເອກະລັກ, ຮີດຄອງປະເພນີ, ວັດທະນາທຳ ອັນເປັນມໍລະດົກໂລກ ແລະ ອື່ນໆອີກຫຼາກຫຼາຍຮູບການ.
ກິດຈະກໍາຄັ້ງນີ້ ຍັງເປັນກິດຈະກຳກິລາໜຶ່ງ ທີ່ຕິດພັນກັບການຊຸກຍູ້, ສົ່ງເສີມວຽກງານການທ່ອງ ທ່ຽວຂອງແຂວງຫຼວງພະບາງ ທັງເປັນການສ້າງສີສັນບັນຍາດກາດ ເພີ່ມມົນສະເໜ່ດຶງດູດນັກທ່ອງທ່ຽວ ທັງພາຍໃນ ແລະຕ່າງປະເທດ ເຂົ້າມາທ່ຽວຊົມເມືອງມໍລະດົກໂລກ ໃຫ້ນັບມື້ນັບຫຼາຍຂຶ້ນ. ຄຽງຄູ່ກັນນີ້, ຍັງເປັນການຊຸກຍູ້-ສົ່ງເສີມໃຫ້ທົ່ວສັງຄົມ, ນັກຮຽນ-ນັກສຶກສາ ຫັນມາອອກກຳລັງກາຍ, ຫຼິ້ນກິລາ-ກາຍະກຳ ເພື່ອສຸຂະພາບ ເຮັດໃຫ້ມີສຸຂະພາບແຂງແຮງ, ມີສະໝອງປອດໂປ່ງ ເພື່ອສຸມໃສ່ການສຶກສາຄົ້ນຄວ້າຮໍ່າຮຽນ ໃຫ້ເປັນຄົນທີ່ສະຫຼາດ, ມີຄວາມຮູ້, ຄວາມສາມາດ ແລະ ສ້າງເປັນຜູ້ສືບທອດ ໃນການພັດທະນາປະເທດຊາດ ໃນອະນາຄົດ.
ຂ່າວ: ທ. ບຸນທະວີ ສົມມະນີ, ຄະນະໂຄສະນາອົບຮົມແຂວງ