ຫຼວງພະບາງ ໂຮມຊຸມນຸມສະເຫຼີມສະຫຼອງວັນສ້າງຕັ້ງພັກ ຄົບຮອບ 70 ປີ
ແຂວງຫຼວງພະບາງ ໂຮມຊຸມນຸມໃຫຍ່ ສະເຫຼີມສະຫຼອງ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ ໃນວັນທີ 22 ມິນາ 2025 ທີ່ສະໂມສອນມະຫາວິທະຍາໄລສຸພານຸວົງ ໂດຍການຖ່າຍທອດສົດຈາກສູນກາງ, ໂດຍມີ ສະຫາຍ ຄຳຂັນ ຈັນທະວີສຸກ ກຳມະການສູນກາງພັກ ເລຂາຄະນະບໍລິຫານງານພັກແຂວງ ພ້ອມດ້ວຍບັນດາຄະນະປະຈຳພັກແຂວງ, ອະດີດການນໍາຂັ້ນແຂວງ, ພະນັກງານປະຕິວັດອາວຸໂສ, ພະນັກງານຫຼັກແຫຼ່ງ, ຊາວໜຸ່ມ-ເຍົາວະຊົນ ເຂົ້າຮ່ວມ.
ໃນພິທີ ຜູ້ເຂົ້າຮ່ວມໄດ້ຮັບຊົມວິດີໂອສາລະຄະດີ ເລື່ອງ “70 ປີ ພາຍໃຕ້ການນໍພາຂອງພັກ” ທັງໄດ້ຮັບຟັງການກ່າວສູນທອນພົດ ຈາກ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ, ເຊິ່ງໄດ້ຫວນຄືນມູນເຊື້ອແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວຂອງພັກປະຊາຊົນປະຕິວັດລາວ, ການນໍາພາຂອງພັກ ຕະຫລອດ 70 ປີ ຜ່ານມາ ເພື່ອສືບຕໍ່ເສີມຂະຫຍາຍ ພາ ລະກໍາປະຫວັດສາດອັນຍິ່ງໃຫຍ່ ແລະ ການສືບຕໍ່ພາລະກິດປະຕິວັດຂອງພັກ ໃຫ້ດໍາເນີນໄປດ້ວຍຄວາມໜັກ ແໜ້ນ ແລະມີໄຊ ພ້ອມທັງຮຽກຮ້ອງໃຫ້ບັນດາສະຫາຍຄະນະພັກ-ຄະນະນໍາແຕ່ລະຂັ້ນ, ພະນັກງານ-ສະມາ ຊິກພັກ, ນັກຮົບປະຕິວັດ ຈົ່ງອອກແຮງຖະນຸບໍາລຸງ, ປັບປຸງກໍ່ສ້າງພັກ, ຍົກສູງມານະຈິດປະຕິວັດ, ຄວາມສາ ມາດນໍາພາ, ເພີ່ມທະວີຄວາມຮັບຜິດຊອບການເມືອງ ຂອງທຸກການຈັດຕັ້ງ ແລະ ສະມາຊິກພັກໃຫ້ສູງຂຶ້ນ.
ໃນພິທີໂຮມຊຸມນຸມໃຫຍ່ຄັ້ງນີ້, ໄດ້ມີການຂຶ້ນກ່າວສະແດງຄວາມຮູ້ສຶກ ຂອງຜູ້ຕາງໜ້າກຳລັງປະກອບອາວຸດ, ຜູ້ຕາງໜ້າຊາວຜູ້ອອກແຮງງານ ແລະ ຊາວໜຸ່ມລາວ ຕໍ່ພັກ ກໍຄື 70 ປີ ພາຍໃຕ້ການນໍາພາຂອງພັກ ປະ ຊາຊົນປະຕິວັດລາວ ຕື່ມອີກ.
ໂອກາດດຽວກັນ, ຍັງມີການປະດັບຫຼຽນກາ ລະນຶກ 70 ປີ ວັນສ້າງຕັ້ງພັກປະຊາຊົນປະຕິວັດລາວ ໃຫ້ອະດີດການນຳ, ພະນັກງານປະຕິວັດ-ອາວຸໂສບຳນານ ແລະ ພະນັກງານການນຳຂອງແຂວງ ຈຳນວນໜຶ່ງ.
ຂ່າວໂດຍ: ທ. ບຸນທະວີ ສົມມະນີ, ຄະນະໂຄສະນາອົບຮົມແຂວງ.