ເປີດນຳໃຊ້ອາຄານຊະນະແກ້ວ ແລະ ໂຮງງານ ຜະລິດນໍ້າດື່ມ ທີ່ຫລວງພະບາງ
ພິທີເປີດນໍາໃຊ້ອາຄານ ຊະນະແກ້ວ ແລະ ໂຮງງານຜະລິດນໍ້າດື່ມແຮ່ທາດ ມິນີໂຣ ຂອງກຸ່ມບໍລິສັດ DSK ຈໍາກັດ ທີ່ບ້ານດອນກາງ ນະຄອນ-ຫຼວງພະບາງ ແຂວງຫຼວງພະບາງ ຈັດຂຶ້ນໃນວັນທີ 28 ທັນວາ 2024 ທີ່ຜ່ານມາ, ໂດຍມີ ພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ທ່ານ ຄໍາຂັນ ຈັນທະວີສຸກ ເຈົ້າແຂວງໆຫຼວງພະບາງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ໄຊຍະສິດ ຊະນະແກ້ວ ປະທານ ກຸ່ມບໍລິສັດ DSK ຈໍາກັດ ໄດ້ກ່າວວ່າ: ການເປີດນຳໃຊ້ອາຄານຊະນະແກ້ວ ຄັ້ງນີ້ ເພື່ອອໍານວຍຄວາມສະດວກ ແກ່ການຊົມໃຊ້ສາທາລະນະປະໂຫຍດຕໍ່ສັງຄົມ ເຊິ່ງປະກອບມີ ຫ້ອງສໍາມະນາ ສໍາລັບໃຫ້ຂໍ້ມູນຄວາມຮູ້ກ່ຽວກັບນໍ້າແຮ່ທາດ ແກ່ແຂກເຂົ້າມາທັດສະນະສຶກສາ ໃນໂຮງງານນໍ້່າແຮ່ທາດ, ມີຫ້ອງປະຊຸມ 6 ຫ້ອງ ເພື່ອຈັດກອງປະຊຸມສໍາຄັນສໍາລັບວິສາຫະກິດ ແລະ ອົງການຈັດຕັ້ງທົ່ວໄປ ສາມາດຮອງຮັບໄດ້ 800 ຄົນ, ທັງມີຫ້ອງຈັດງານລ້ຽງ 1 ຫ້ອງ ທີ່ມີທັງຮ້ານອາຫານ ແລະຮ້ານກາເຟ ສາມາດຮອງຮັບໄດ້ເຖິງ 400 ຄົນ, ສ່ວນໂຮງງານຜະລິດນ້ຳແຮ່ທາດມີນິໂຣ ເປັນຜະລິດຕະພັນທີ່ຜ່ານຂະບວນການຜະລິດ ດ້ວຍເຕັກໂນໂລຊີຂັ້ນສູງນັບຈາກແຫຼ່ງນ້ຳຈົນເຖິງຂວດນ້ຳດື່ມ ໂດຍມີກຳລັງການຜະລິດ 12.000 ຕຸກຕໍ່ຊົ່ວໂມງ, ເປັນຜະລິດຕະພັນຂອງຄົນລາວ 100%, ສາມາດຈໍາໜ່າຍ ຢູ່ຕະຫຼາດພາຍໃນ ແລະ ສົ່ງອອກໄປຕ່າງປະເທດ ດ້ວຍແຫຼ່ງນໍ້າ ແລະລົດຊາດຂອງແຮ່ທາດທີ່ເປັນເອກະລັກ ຊ່ວຍໃຫ້ຜະລິດຕະພັນນ້ຳແຮ່ທີ່ມີຄຸນນະພາບ ໄດ້ຮັບການຢັ້ງຢືນ ຈາກມາດຕະຖານສາກົນຫຼາຍອົງການ ແລະ ສະຖາບັນ ລົດຊາດສາກົນຈາກ ປະເທດແບນຊິກ. ການເຄື່ອນໄຫວທຸລະກິດຂອງກຸ່ມບໍລິສັດ DSK ປະກອບມີ: ຕະຫຼາດໂພສີ ແຂວງຫຼວງພະບາງ, ໂຮງແຮມ ຊະນະແກ້ວ Flora (ໂຟຣາ), ໂຮງແຮມຊະນະແກ້ວ ບູຕິກ, ເຂື່ອນໄຟຟ້າ ນໍ້າຜາໃຫຍ່ ແຂວງໄຊສົມບູນ, ໂຮງງານເບຕົງ ຫຼັກ 21, ໂຮງງານນໍ້າດື່ມ ມິນີໂຣ ແລະນໍ້າໝາກໄມ້, ໂຄງການປູກຕົ້ນໄມ້ ເພື່ອຮັກສາແຫຼ່ງນໍ້າ ແລະ ອາຄານ ຊະນະແກ້ວ (Sanakeo) ໂດຍມີເປົ້າໝາຍການຜະລິດ ແລະ ບໍລິການ ໃຫ້ມີຄຸນນະພາບ ມາດຕະຖານສາກົນ ທັງສ້າງວຽກເຮັດງານທໍາ ອາຊີບທີ່ໝັ້ນຄົງຍາວນານ ໃຫ້ຄົນພາຍໃນປະເທດ ຕິດພັນກັບການປົກປັກຮັກສາສະພາບແວດລ້ອມ ໃຫ້ຍືນຍົງຍາວນານ.
ໂອກາດນີ້, ພະນະທ່ານ ສອນໄຊ ສີພັນດອນ ໄດ້ສະແດງຄວາມຊົມເຊີຍຕໍ່ກຸ່ມບໍລິສັດ DSK ຈໍາກັດ ທີ່ດຳເນີນທຸລະກິດ ມີການພັດທະນາຂຶ້ນເລື້ອຍໆ ທັງຮຽກຮ້ອງໃຫ້ສືບຕໍ່ດຳເນີນທຸລະກິດ ໃຫ້ປະສົບຜົນສຳເລັດ ປະກອບສ່ວນແກ່ການພັດທະນາ ແລະ ສ້າງວຽກເຮັດງານທຳ ແກ່ທ້ອງຖິ່ນ ແຂວງຫຼວງພະບາງໃຫ້ຫຼາຍຂຶ້ນ.
ໃນພິທີ ຍັງໄດ້ເຊັນບົດບັນທຶກການສົ່ງຜະລິດຕະພັນນ້ຳດື່ມ Mineral Premium (ມີນິໂຣພີມຽມ) ໄປຂາຍທີ່ປະເທດສິງກະໂປ ແລະ ປະເທດໄທ ຕື່ມອີກ.
ຂ່າວ: ທ. ບຸນທະວີ ສົມມະນີ, ຄະນະໂຄສະນາອົບຮົມແຂວງ.