ເປີດອົບອົບຮົມມະຫາຊົນຜູ້ກ້າວໜ້າເພື່ອຂະຫຍາຍເຂົ້າເປັນສະມາຊິກພັກ ຊຸດທີ III ປະຈໍາປີ 2024
ໃນລະຫວ່າງວັນທີ 3-4 ກໍລະກົດ 2024 ນີ້ ຢູ່ທີ່ຫ້ອງປະຊຸມຂອງຄະນະໂຄສະນາອົບຮົມແຂວງໄດ້ມີການຈັດຕັ້ງອົບຮົມມະຫາຊົນຜູ້ກ້າວໜ້າ ເພື່ອຂະຫຍາຍເຂົ້າເປັນສະມາຊິກພັກ ຊຸດທີ່ III ຄັ້ງວັນທີ 3-4 ກໍລະກົດ ປະຈໍາປີ 2024 ໂດຍການເປັນ ປະທານ ຂອງສະຫາຍ ທອງຈັນ ພົມມະລັດ ຮອງເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ. ມີຄະນະຮັບຜິດຊອບ ແລະ ນັກສຳມະນາກອນມາຈາກຄະນະພັກຮາກຖານ ທະນາຄານແຂວງຫຼວງພະບາງ, ຄະນະພັກຮາກຖານ ວິທະຍາໄລຄູຫຼວງພະບາງ, ໜ່ວຍພັກຄະນະກວດກາພັກ-ລັດແຂວງຫຼວງພະບາງ, ໜ່ວຍພັກພະແນກການຕ່າງປະເທດແຂວງ ຈໍານວນ 12 ສະຫາຍ, ຍິງ 6 ສະຫາຍ.
ໃນພິທີ ປະທານໄດ້ມີຄຳເຫັນຊີ້ນຳບັ້ນອົບຮົມ ເຊິ່ງເພິ່ນໄດ້ເນັ້ນໜັກໃຫ້ນັກສໍາມະນາກອນຮັບຮູ້ຢ່າງເລິກເຊິ່ງ ກ່ຽວກັບພັກປະຊາຊົນປະຕິວັດລາວ, ເງື່ອນໄຂເພື່ອຝຶກຝົນຫຼໍ່ຫຼອມຕົນເອງເຂົ້າເປັນສະມາຊິກພັກ, ຂໍ້ຫ້າມສໍາລັບສະມາຊິກພັກ, ຜົນປະໂຫຍດທີ່ຈະໄດ້ຮັບ ແລະ ສິ່ງທີ່ຕ້ອງໄດ້ເອົາໃຈໃສ່ປົກປ້ອງບົດບາດ, ກຽດສັກສີຂອງພັກ ເມື່ອເຂົ້າເປັນສະມາຊິກພັກປະຊາຊົນປະຕິວັດລາວ ຍົກໃຫ້ເຫັນໜ້າທີ່ການເມືອງຂອງພັກໃນແຕ່ລະໄລຍະນັບທັງສິ່ງທ້າທາຍທີ່ມີຕໍ່ພັກ, ຕໍ່ປະເທດຊາດ.
ການອົບຮົມໃນຄັ້ງນີ້ແມ່ນນຳໃຊ້ເອກະສານອົບຮົມມະຫາຊົນຜູ້ກ້າວໜ້າເພື່ອຂະຫຍາຍເຂົ້າເປັນສະມາຊິກພັກ 13 ຄໍາຖາມ 13 ຄໍາຕອບ ຂອງຄະນະໂຄສະນາອົບຮົມສູນກາງພັກສົ່ງໃຫ້. ການອົບຮົມແມ່ນໄດ້ນຳໃຊ້ວິທະຍາກອນມາຈາກ ຄະນະໂຄສະນາອົບຮົມແຂວງ 3 ສະຫາຍ ແລະ ໄດ້ດຳເນີນເປັນເວລາ 2 ວັນ.
