ເປີດອົບຮົມມະຫາຊົນຜູ້ກ້າວໜ້າເພື່ອຂະຫຍາຍເຂົ້າເປັນສະມາຊິກພັກ ຊຸດທີ IV ປະຈໍາປີ 2025
ລະຫວ່າງວັນທີ 9-10 ກໍລະກົດ 2025 ນີ້ ຄະນະໂຄສະນາອົບຮົມແຂວງໄດ້ມີການຈັດພິທີ ອົບອົບຮົມມະຫາຊົນຜູ້ກ້າວໜ້າ ເພື່ອຂະຫຍາຍເຂົ້າເປັນສະມາຊິກພັກ ຊຸດທີ IV ໂດຍການເປັນ ປະທານ ຂອງສະຫາຍ ສົມຈິດ ສິງລໍຄຳ ຮອງເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ. ມີຄະນະຮັບຜິດຊອບ ແລະ ນັກສຳມະນາກອນມາຈາກໜ່ວຍພັກຄະນະໂຄສະນາອົບຮົມແຂວງ, ຄະ ນະພັກຮາກຖານພະແນກສາທາລະນະສຸກແຂວງ, ຄະນະພັກຮາກຖານມະຫາວິທະຍາໄລ ສຸພານຸວົງ ທັງໝົດມີ 19 ສະຫາຍ, ຍິງ 13 ສະຫາຍ.
ສໍາລັບບົດຮຽນທີ່ນໍາມາອົບຮົມໃນຄັ້ງນີ້ແມ່ນນຳໃຊ້ເອກະສານ 13 ຄໍາຖາມ 13 ຄໍາຕອບ ຂອງຄະນະໂຄສະນາອົບຮົມສູນກາງພັກ ກຳນົດໃຫ້, ການອົບຮົມໃນຄັ້ງນີ້ ເພື່ອໃຫ້ມະຫາຊົນຜູ້ກ້າວໜ້າຜູ້ທີ່ຈະຂະຫຍາຍເຂົ້າເປັນສະມາຊິກພັກ ຮັບຮູ້ເບື້ອງຕົ້ນກ່ຽວກັບປະຫວັດຄວາມເປັນມາ, ອຸດົມການ ແລະ ທາດແທ້ຂອງພັກປະຊາຊົນປະຕິວັດລາວ ເຂົ້າໃຈມາດຖານ ແລະ ເງື່ອນໄຂຜູ້ທີ່ຈະຂະຫຍາຍເຂົ້າເປັນສະມາຊິກພັກ ແລະ ຜົນປະໂຫຍດຂອງສະມາຊິກພັກ ເຮັດໃຫ້ມະຫາຊົນມີຄວາມຮັບຮູ້, ເຂົ້າໃຈເລິກກ່ຽວກັບການກໍ່ສ້າງ ແລະ ຂະຫຍາຍພັກ, ກຳໄດ້ເນື້ອໃນພື້ນຖານ ແລະ ຫຼັກການລວມຂອງພັກ, ພ້ອມທັງຮັບຮູ້ ສັງເກດຕີລາຄາ ແລະ ວິເຄາະບັນຫາໄດ້ໃນລະດັບໃດໜຶ່ງທີ່ແນ່ນອນ.
ໃນຕອນທ້າຍ ປະທານພິທີ ໄດ້ເໜັ້ນໃຫ້ມະຫາຊົນຜູ້ກ້າວໜ້າ ຕ້ອງຮັບຮູ້ ກ່ຽວກັບມາດຖານ ແລະ ເງື່ອນໄຂຕ່າງໆ ບົນພື້ນຖານຄວາມເຂົ້າໃຈດັ່ງກ່າວ ຕ້ອງຕັ້ງໜ້າຝືກຝົນຫຼໍ່ຫຼອມຕົນເອງ ໃຫ້ໄດ້ມາດຖານ ແລະ ເງື່ອນໄຂຄົບຖ້ວນ ແລະ ມີຄວາມຕື່ນຕົວສະໝັກໃຈເຂົ້າເປັນສະມາຊິກພັກ ປະຊາຊົນປະຕິວັດລາວ ເພື່ອເພີ່ມກໍາລັງແຮງສູ້ຮົບໃຫ້ແກ່ພັກ ນັບມື້ນັບຫຼາຍຂື້ນ ກາຍເປັນພະນັກງານນໍາພາທີ່ມີປະສົບການ ເຮັດໃຫ້ວຽກງານມີປະສິດທິພາບ ແລະ ປະສິດທິຜົນ ຍົກໃຫ້ເຫັນໜ້າທີ່ການເມືອງຂອງພັກໃນແຕ່ລະໄລຍະນັບທັງສິ່ງທ້າທາຍທີ່ມີຕໍ່ພັກ, ຕໍ່ປະເທດຊາດ ຈາກນັ້ນ ກໍ່ໄດ້ມອບມະຕິຕົກລົງຂອງຄະ ນະປະຈໍາພັກແຂວງ ແລະ ໜັງສືນຳສົ່ງຂອງຄະນະໂຄສະນາອົບຮົມແຂວງໃຫ້ນັກສໍາມະນາກອນ.
ການອົບຮົມແມ່ນໄດ້ນຳໃຊ້ວິທະຍາກອນມາຈາກ ຄະນະໂຄສະນາອົບຮົມແຂວງ 3 ສະຫາຍ ແລະ ໄດ້ດຳເນີນເປັນເວລາ 2 ວັນເຕັມ.
ໂດຍ: ທ. ສຸດທະວີໄຫວ ມີທະວົງ, ຄະນະໂຄສະນາອົບຮົມແຂວງ
ກວດແກ້: ທ. ບຸນທະວີ ສົມມະນີ, ຄະນະໂຄສະນາອົບຮົມແຂວງ