ເມືອງນານ ຈັດຕັ້ງພິທີ ໂຄສະນາປາຖະກະຖາ ວັນສໍາຄັນທາງປະຫວັດສາດ
ຕອນເຊົ້າ ວັນທີ 30 ສິງຫາ 2024 ທີ່ຜ່ານມານີ້, ເມືອງນານ ແຂວງຫຼວງພະບາງ ໄດ້ຈັດພິທີ ໂຄສະນາປາຖະກະຖາ 2 ວັນປະຫວັດສາດທີ່ສໍາຄັນ ຂອງຊາດ,ຂອງພັກຄື: ວັນລັດຖະທຳມະນູນແຫ່ງ ສປປ ລາວ ຄົບຮອບ 33 ປີ (15 ສິງຫາ) ແລະ ວັນຢຶດອໍານາດທົ່ວປະເທດ 23 ສິງຫາ ຄົບຮອບ 79 ປີ, ໂດຍການເປັນປະທານ ຂອງທ່ານ ສາຍບຸນທີ ມະນີວົງ ຮອງເລຂາພັກເມືອງ. ປະທານຄະນະກວດກາພັກ, ອົງການກວດກາລັດເມືອງ, ມີບັນດາສະຫາຍຄະນະປະຈຳ, ກຳມະການພັກເມືອງ,ຫົວໜ້າ-ຮອງຫົວໜ້າຫ້ອງການ,ສະມາຊິກພັກ, ພະນັກງານ, ທະຫານ, ຕຳຫຼວດແລະ ນາຍບ້ານ 15 ບ້ານໃນເທດສະບານເມືອງ ເຂົ້າຮ່ວມ.
ຈຸດປະສົງຂອງການປາຖະກະຖາ 2 ວັນປະຫວັດສາດໃນຄັ້ງນີ້ ກໍ່ເພື່ອເປັນການໂຄສະນາສຶກສາອົບຮົມການເມືອງ-ແນວຄິດໃຫ້ຄະນະພັກ, ສະມາຊິກພັກ, ພະນັກ ງານ-ລັດຖະກອນ, ທະຫານ, ຕຳຫຼວດ, ແລະ ພາກສ່ວນຕ່າງໆ ຮັບຮູ້ ແລະ ເຫັນໄດ້ບົດບາດຄວາມສຳ ຄັນໃນການກໍາເນີດເຕີບໃຫຍ່ຂະຫຍາຍຕົວມູນເຊື້ອອັນດີງາມ ແລະ ພ້ອມກັນນໍາເອົາມູນເຊື້ອດັ່ງກ່າວໄປ ເຜີຍແຜ່ເຊື່ອມຊຶມ ແລະຈັດຕັ້ງປະຕິບັດໃນທ້ອງຖິ່ນຮາກຖານຂອງຕົນ, ເພື່ອເສີມຂະຫຍາຍທາດແທ້ຄຸນທາດການເມືອງ, ຄຸນສົມບັດສິນທໍາປະຕິວັດ ດ້ວຍຄວາມຮັບຜິດຊອບສູງ, ພ້ອມກັນຮັດແໜ້ນຄວາມສາມັກຄີປອງດອງທົ່ວປວງຊົນ, ຍົກສູງສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິ ຂອງພວກຄົນບໍ່ຫວັງດີ, ເຊີດຊູນໍ້າໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ເພື່ອພັດທະນາກົມກອງ, ພັດທະນາຄອບຄົວ ແລະ ພັດທະນາປະເທດຊາດໃຫ້ຈະເລີນຍິ່ງໆຂຶ້ນ.
ຂຽນຂ່າວໂດຍ: ທ່ານ ບຸນແພງ ຈັນຟອງ ຄະນະໂຄສະນາອົບຮົມເມືອງນານ
ກວດແກ້ : ທ່ານ ບຸນທະວີ ສົມມະນີ ຄະນະໂຄສະນາອົບຮົມແຂວງ