ແຂວງຫຼວງພະບາງຈັດຕັ້ງພິທີສະເຫຼີມສະຫຼອງ 2 ວັນສຳຄັນປະຫວັດສາດ
ໃນຕົ້ນເດືອນທັນວາ 2024, ຄະນະໂຄສະນາອົບຮົມແຂວງ ໄດ້ສົມທົບກັບບັນດາພະແນກການ, ກົມກອງ ແລະ ບັນດາເມືອງ-ນະຄອນ ອ້ອມຂ້າງແຂວງ ເພື່ອພ້ອມກັນຈັດຕັ້ງພິທີໂຄສະນາປາຖະກະຖາວັນຊາດ ທີ 2 ທັນວາ ຄົບຮອບ 49 ປີ ແລະ ວັນເກີດປະທານ ໄກສອນ ພົມວິຫານ ຄົບ ຮອບ 104 ປີ.
ໂດຍປະຕິບັດຕາມທິດຊີ້ນຳ ຂອງກອງປະຊຸມຄະນະປະຈຳພັກແຂວງຫຼວງພະບາງ ປະຈຳເດືອນ 10-11.2024, ຄັ້ງວັນທີ 15.11.2024, ວ່າດ້ວຍການກະກຽມພິທີສະເຫຼີມສະຫຼອງ 2 ວັນປະຫວັດສາດສຳຄັນ ຂອງຊາດ ແລະ ຂອງທ່ານຜູ້ນຳ ໃຫ້ຈັດຕັ້ງເປັນຂະບວນຄຶກຄື້ນ ແລະ ກວ້າງຂວາງໃນທົ່ວແຂວງ.
ຄະນະປະຈຳພັກແຂວງຫຼວງພະບາງ ໄດ້ຈັດແບ່ງເປັນແຕ່ລະຂົງເຂດວຽກງານ ແລະ ມອບໃຫ້ສະຫາຍຄະນະປະຈຳພັກແຂວງ, ກຳມະການພັກແຂວງ, ເລຂາພັກເມືອງ-ນະຄອນ ແລະ ສະຫາຍເລຂາຄະນະພັກຮາກຖານໃນທົ່ວແຂວງ ເປັນຜູ້ນຳພາໂດຍກົງ.
ຈາກນັ້ນ, ທຸກໆຂົງເຂດ ກໍ່ໄດ້ມີການສ້າງຂະບວນການຕ່າງໆ ເປັນຕົ້ນແມ່ນອອກແຮງງານອານາໄມຕາມສະຖານທີ່ຕົນຮັບຜິດຊອບຂອງຕົນ, ຕິດປ້າຍຄຳຂວັນໂຄສະນາປຸກລະດົມ, ຕິດທຸງທີວ. ຮອດວັນທີ 2 ທັນວາ 2024 ຄະນະນຳແຕ່ລະຂົງເຂດ ທັງພາຍໃນເທດສະບານແຂວງ ແລະ ບັນດາເມືອງ-ນະຄອນ ກໍ່ໄດ້ມີພິທີວາງກະຕ່າດອກໄມ້ຢູ່ອານຸສາວະລີຂອງທ່ານຜູ້ນຳ ແລະ ອານຸສາວະລີຂອງນັກຮົບນິລະນາມ. ຕໍ່ມາກໍ່ໄດ້ມີການຈັດຕັ້ງພິທີປາຖະກະຖາ ແລະ ພ້ອມທັງຮັບຊົມການສາຍຮູບເງົາສາລະຄະດີກ່ຽວກັບມູນເຊື້ອ, ຜົນງານການເຄື່ອນໄຫວດ້ານຕ່າງໆ ຂອງພັກ ຂອງທ່ານຜູ້ນໍາ ຢ່າງເປັນຂະບວນຟົດຟື້ນໃນທົ່ວສັງຄົມ.
ການຈັດຕັ້ງພິທີດັ່ງກ່າວນີ້, ກໍ່ເພື່ອທົບທວນຄືນມູນເຊື້ອ ແລະ ພາລະກິດ ຕໍ່ສູ້ປົດປ່ອຍຊາດ ໃນເມື່ອກ່ອນ ກໍຄືຜົນສໍາເລັດໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການຊີ້ນໍາ-ນໍາພາ ຂອງພັກ, ຖືເອົາໂອກາດນີ້ ເປັນການສຶກສາອົບຮົມພະນັກງານ-ລັດຖະກອນ, ສະມາຊິກພັກ, ທະຫານ, ຕໍາຫຼວດ ເພື່ອຍົກສູງນໍ້າໃຈຮັກຊາດ, ເສີມຂະຫຍາຍມູນເຊື້ອຄວາມສາມັກຄີເປັນຈິດໜຶ່ງໃຈດຽວ ຂອງປະຊາຊົນລາວບັນດາເຜົ່າ ແລະ ຍູ້ແຮງບົດບາດການນໍາ ຂອງພັກ. ຖືເອົາການສະເຫຼີມສະຫຼອງວັນຊາດ ທີ 2 ທັນວາ ຄົບຮອບ 49 ປີ, ເປັນການໂຄສະນາປຸກລະດົມນໍ້າໃຈຮັກຊາດ ຮັກລະບອບໃໝ່, ເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ສຸມທຸກກຳລັງ ເພື່ອສືບຕໍ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ທ້າຍສະໄໝ ໃຫ້ປະກົດຜົນເປັນຈິງ. ເພື່ອລະນຶກເຖິງຄຸນງາມຄວາມ ດີຂອງ ປະທານ ໄກສອນ ພົມວິຫານ ທີ່ມີຕໍ່ປະເທດຊາດ ແລະ ຮໍ່າຮຽນເອົາຄຸນທາດການເມືອງ, ຄຸນສົມບັດສິນທຳປະຕິວັດ, ແບບແຜນວິທີເຮັດວຽກ, ແບບແຜນດຳລົງຊີວິດ ແລະ ແບບຢ່າງອັນດີງາມຂອງເພິ່ນ ເພື່ອຝຶກຝົນຫຼໍ່ຫຼອມຕົນເອງ ໃຫ້ກາຍເປັນພະນັກງານ, ສະມາຊິກພັກທີ່ດີ ເພື່ອສຶບທອດພາລະກິດ ຂອງພັກ. ຖືເອົາການສະເຫຼີມສະຫຼອງ 2ວັນປະຫວັດສາດດັ່ງກ່າວ ເປັນກິດຈະກໍາໜຶ່ງ ໃນຂະບວນການກະກຽມດໍາເນີນກອງປະຊຸມໃຫຍ່ 3 ຂັ້ນ ຂອງພັກ ເພື່ອສ້າງຄວາມຮັບຮູ້-ເຂົ້າໃຈ ຢ່າງເລິກເຊິ່ງຕໍ່ຜົນງານ ແລະ ໄຊຊະນະ ກໍ່ຄືມູນເຊື້ອການຕໍ່ສູ້ອັນບາກບັ່ນ ພະຍາຍາມ ຂອງປະຊາຊົນລາວບັນດາເຜົ່າ ໂດຍພາຍໃຕ້ການນໍາພາ ຂອງພັກ ໃຫ້ພະນັກງານ, ສະມາຊິກພັກ ແລະ ປະຊາຊົນລາວບັນດາເຜົ່າ, ເພື່ອສືບຕໍ່ບຸກທະລຸທາງດ້ານແນວຄິດຈິນຕະນາການ, ສ້າງໃຫ້ມີການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ, ທັງເຮັດສຳເລັດໜ້າທີ່ວຽກງານ ທີ່ພັກ-ລັດ ແລະ ປະຊາຊົນມອບໝາຍໃຫ້.
ຂຽນໂດຍ: ທ.ບຸນທະວີ ສົມມະນີ, ຄະນະໂຄສະນາອົບຮົມແຂວງ ຫຼບ.