ກອງປະຊຸມທາບທາມບຸກຄະລາກອນເຂົ້າໃສ່ໂຄງປະກອບ ຄະນະບໍລິຫານງານພັກແຂວງ
ສະໄໜທີ IX ຮອບທີ 1
ກອງປະຊຸມທາບທາມດັ່ງກ່າວ ໄດ້ຈັດຂຶ້ນໃນວັນທີ 16 ກໍລະກົດ 2025 ຢູ່ທີ່ສະໂມສອນ ຂອງເມືອງ ໃຫ້ກຽດເປັນປະທານ ຂອງສະຫາຍ ຄຳຫຼ້າ ລຽນປະດິດ ກຳມະການປະຈຳພັກແຂວງ ປະທານກວດກາພັກ-ຫົວໝ້າອົງການກວດກາລັດ ແຂວງຫຼວງພະບາງ,
ມີຄະນະປະຈໍາ, ກໍາມະການພັກເມືອງ, ຄະນະຮັບຜິດຊອບບຸກຄະລາກອນຂັ້ນແຂວງ, ຂັ້ນເມືອງ, ເລຂາ-ຮອງເລຂາ ຄະນະພັກຮາກຖານ, ເລຂາຮອງເລຂາ, ຄະນະໜ່ວຍພັກສຳນັກງານ, ຫົວໜ້າ-ຮອງຫົວໜ້າຫ້ອງການ, ຄະນະພັກຮາກຖານກອງບັນຊາການ ປກຊ-ປກສ ພາຍໃນເມືອງ ເຂົ້າຮ່ວມ, ໃນວ່າລະກອງປະຊຸມ ໄດ້ຮັບຟັງການຜ່ານມາດຖານ, ເງື່ອນໄຂຜູ້ຮັບສະໝັກເລືອກຕັ້ງເຂົ້າໃນຄະນະບໍລິຫານງານພັກ ແຂວງຫຼວງພະບາງ ສະໄໝທີ IX ຮອບທີ 1 ໂດຍພື້ນຖານແມ່ນອີງໃສ່ມາດຖານລວມ ແລະ ມາດຖານສະເພາະ ຂອງຄະນະບໍລິຫານພັກທີ່ໄດ້ກຳນົດໄວ້, ນະໂອກາດດຽວກັນ ສະຫາຍ ຄຳຫຼ້າ ລຽນປະດິດ ປະທານກອງປະຊຸມ ໄດ້ມີຄໍາເຫັນຊີ້ນໍາຕໍ່ຄະນະບໍລິຫານງານພັກເມືອງ, ຜູ້ແທນເຂົ້າຮ່ວມ ຕ້ອງເປັນເຈົ້າການ ຈັດຕັ້ງປະຕິບັດດ້ວຍຄວາມຮັບຜິດຊອບສູງ, ເລືອກໄດ້ຜູ້ທີ່ມາດຖານເງື່ອນໄຂຄົບຖ້ວນ, ຮັບປະກັນຄຸນລັກສະນະ, 3 ລຸ້ນຄື: ລຸ້ນອາວຸໂສ, ລຸ້ນກາງ ແລະ ລຸ້ນໜຸ່ມ, ຜູ້ທີ່ມີວິໄສທັດໃນການນໍາພາ-ຊີ້ນໍາ, ຍຶດໝັ້ນຕໍ່ແນວທາງ ຂອງພັກ ແລະ ມີຜົນງານທີ່ພົ້ນເດັ່ນໃນຂະບວນການຈັດຕັ້ງປະຕິບັດໜ້າທີ່ວຽກງານ,
ຈາກນັ້ນຜູ້ແທນກອງປະຊຸມຍັງໄດ້ໃຊ້ສິດປະຊາທິປະໄຕດຳເນີນການປ່ອນບັດທາບທາມບຸກຄະລາກອນ, ເຂົ້າໃສ່ໂຄງປະກອບຄະນະບໍລິຫານງານພັກ ແຂວງຫຼວງພະບາງສະໄໜທີ IX ຮອບທີ 1 ໂດຍມີຜູ້ແທນເຂົ້າຮ່ວມທາບທາມທັງໝົດ 65 ສະຫາຍ, ຍິງ 12 ສະຫາຍ.
ຂຽນຂ່າວໂດຍ: ພັນທະລີ ສຸກຂະເສີມ ຈາກຄະນະໂຄສະນາອົບຮົມ ເມືອງຈອມເພັດ
ກວດແກ້: ທ. ບຸນທະວີ ສົມມະນີ, ຄະນະໂຄສະນາອົບຮົມແຂວງ